MATAG-OB, Leyte - Lalake nga mo graduate na unta sa senior high school nadakpan sa buy bust operation, alas 5:30 sa hapon, Sabado, Marso 23, 2019.
Giila ang suspek nga si Arnel Monsales, 20, tinun-an sa senior high school sa Palompon, Leyte.
Nakuha gikan sa dinakpan ang tulo ka mga nilikit nga papel nga dunay sud nga marijuana ug buy bust money.
Nahitabo ang transaksyon sa kapulisan ug suspek sa highway sakop sa Barangay Sta. Rosa sa Matag-ob.
Masakiton ang amahan ni Monsales ug bag-o lang namatay ang iyang inahan.
Nagduda ang kapulisan nga posibleng gihimong suloguon si Monsales sa paghatod sa marijuana.
Duna say nagtuo nga gihimo kini ni Monsales aron dunay ikagasto sa graduation niini.
Apan ang suspek igo na lang sa paghilak atubangan sa mga pulis. (JKDP)