GIAWHAG ni Konsehal Dave Tumulak ang mga motorista sa pag-report ngadto sa iyang buhatan may labot sa mga pay-parking operator lakip na ang mga mall nga nikolekta og lapas P20 sulod sa tulo ka oras.
Ang konsehal nagkanayon nga base sa City Ordinance 2089 kun “ An ordinance setting standards for the operation of privately owned “off street” pay parking areas in Cebu City and providing penalties for non compliance of required standards,” ang mga private pay parking operator gitugotan nga makakolekta sa mosunod.
Para sa gitawag og class A nga parking space kun sementado nga lugar, adunay comfort room ug limpoyo ang palibot, makakolekta sila og P20 sa tulo ka oras ug P5 para sa mosunod nga mga takna.
Sa class B kun lugar nga wala gi-develop ug gigamit para lang adunay kaparadahan ang mga sakyanan, sila gitugotan sa ordinansa nga makapaningil og P10 sulod sa tulo ka oras ug tag P5 sa mosunod nga 60 minutos.
Kinahangkan adunay business permit, comfort rooms, Citom clearance, official receipt ug diin kon di kini masunod, ma-revoke ang ilang permit.
“Atong gi-warning-an ang mga business establishment nga mohunong sa pag-overcharge ug motuman sa atong City Ordinance No 2089. Kon di man patuo, atong pasakaan og kaso,”padayag sa konsehal.
“Atong gipahibawo ang mga private car owner sa pag-report sa mga ebedinsya sama sa resibo diri sa atong opisina para sa ingon, makahimo ta og legal actions para sa mga operator nga nagpatuyang lang og kolekta ug para sab atong mabadlong,” dugang ni Tumulak.
Gipasabot ni Tumulak nga kadtong mga nangolekta lapas sa gikatakda sa City Ordinance No 2089 makamulta og P1,000, apan di molapas sa P5,000 o pagka-priso og unom ka buwan apan di molapas sa usa ka tuig base sa ordinansa nga napasar niadtong Setyembre 5, 2006.
Samtang ang Cebu City Government kansang parking operation bag-ohay lang gitugyan ngadto sa private company mangolekta og P20 matag oras base sa City Ordinance 2315 niadtong 2012 sa mga lugar nga gideklara nga pay parking zones.