SI KANHI Sibonga mayor ug karon incumbent nga konsehal, Lionel Bacaltos, mag-atubang og unom ka buwan nga suspension human ang Court of Appeals (CA) nibaliktad sa hukom sa anti-graft office nga nagpakaway sala kaniya sa iyang kapakyas sa pag-aprobar sa application alang sa business permit sa iyang kanhi pulitikanhong kaatbang.
Sa ilang hukom nga giluwatan niadtong Pebrero ning tuiga, ang CA 18th Division niingon nga si Bacaltos napalgang guilty sa grave abuse of discretion and conduct prejudicial to the best interest of service tungod sa wa pagtagad sa application sa business permit ni kanhi Sibonga mayor Nestor Ponce.
Si Ponce mao karon ang kapitan sa Barangay Poblacion sa samang lungsod.
Si Ponce, kinsa nanag-iya og prawn farm business sa Barangays Simala ug Bagacay sa samang lungsod, nipasaka og kaso batok kang Bacaltos sa 2015 human ang iyang business permit application wa tagda.
Siya nidugang nga gawas nga wa kini tagda, si Bacaltos giingong nipa-submit kaniya og dugang requirements nga wa na kinahanglana kay wa gilatid sa balaud, ubos sa hulga nga sirhan ang iyang negusyo.
Sa ilang 12 ka pahina nga hukom, ang CA niingon nga si Bacaltos nakahimo og grave abuse of authority pinaagi sa iyang padayong pagdumili sa pagtagad sa aplikasyon ni Ponce bisan sa iyang pagkadawat sa mga dokumento.
“Adding insult to injury, respondent Mayor (Bacaltos) requested for additional documents from petitioner, some of which were not included in the checklist of requirements appearing in the Application Form for Business Permit,” matod sa hukom.
Di kini unang higayon nga si Ponce nakasinati og kalisdanan sa pag-apply og business permit atol sa panahon ni Bacaltos isip mayor.
Niadtong 2008, si Ponce niduso og petition for mandamus batok kang Bacaltos human ang nauwahi nidumili sa pag-aprobar sa business permit alang sa iyang prawn farm.
Bisan ang Regional Trial Court sa Argao, Cebu nipabor kang Bacaltos batok kang Ponce sa iyang hukom niadtong 2009, ang CA nibaliktad sa hukom sa lower court ug nimando kang Bacaltos sa paglihok sud sa 30 ka adlaw sa aplikasyon ni Ponce gikan sa 2008.
Apan matod ni Ponce nga bisan sa hukom sa CA, si Bacaltos padayong nagdumili sa paglihok sa business permit application.
Sa 2015, ang Office of the Ombudsman-Visayas nimando kanila ni Ponce ug Bacaltos sa pag-submit sa ilang tagsa ka position papers. (JKV sa Sunstar Cebu)