NAGTINGKAGOL sa detention cell sa Lapu-Lapu City Police Office ang usa ka kanhi konsehal sa Brgy. Marigondon, Dakbayan sa Lapu-Lapu, human pasanginling nilugos sa usa ka amang niadtong Biyernes sa gabii Marso 22.
Ang amang mabdos og tulo ka buwan.
Ang suspek nailhang si Esmeraldo Andales, 61, kinsa silingan sa biktima. Si Andales nanghimakak sa pasangil.
Matod ni Chief Inspector Juan Capacio, hepe sa Marigondon Police Station, nga base sa imbestigasyon sa ilang Women’s Desk, nagpatabang sa ilang police station ang biktima uban ang inahan niini human giingong gilugos ni Andales sud sa sakyanan niini.
GIPASAKAY
Giingong naglakaw ang biktima sa dalan sa barangay niadtong Biyernes sa gabii dihang gihunongan ni Andales.
Iyang gipasakay ang biktima ug gidala sa panimay niini.
Giingong adunay nakakitang bata sa duha, kinsa dali nga nisumbong sa inahan sa biktima.
Human masayod sa hitabo, daling giapas sa inahan ang iyang anak sa panimay ni Andales.
NAAKTUHAN
Giingong naaktohan sa inahan ang pagpahimus ni Andales sa iyang anak dihang iyang giablihan ang pultahan sa sakyanan sa suspek.
Unang girumbo sa inahan ang balay ni Andales apan wa didto dihang ilang gituktok.
Gibutyag ni Capacio nga ang biktima nagsabak og tulo ka buwan sa laing lalake, apan giingong gibiyaan kini gumikan kay kanunay molakaw magabii.
“Humana kuno after nato (pagkasakop sa awto) kay didto man kuno sa balay. Unya nigawas na siguro pag abot sa mama. Unya mao to nagkalalis sila didto, mao to niabot sila sa station,” matod ni Capacio.
Si Andales, sa iyang bahin, nihimakak sa pasangil batok kaniya.
Matod niya nga siya usab naglibog nganong kalit nga gipasanginlan sa biktima.
Di sila suod sa biktima apan mosuroy kini sa iyang internetan hinungdan nga iyang matagad.
Duol ra usab ang ilang balay hinungdan nga moagi ra usab kanunay sa ilaha.
Wa usab silay kasungian sa pamilya sa biktima.
Kasong pagpanglugos ang atubangon ni Andales.
“Dili gyud na tinuod. Wala gyud ko magbuhat ana. Ambot anang iyang ginikanan,” matod ni Andales.