KAPIN kun kulang 300 ka mga opisyal sa barangay ug lideres ang mitambong sa gihimong barangay summit sa partidong Hugpong ng Pagbabago (HNP) sa Laderas Function Hall, sa dalang Rizal Avenue, dakbayan sa Digos Martes sa buntag.
Mitambong sa summit si Davao Occidental Governor Claude Bautista nga mao ang Regional President sa HNP, kinsa nagbutyag nga tumong sa panagtapok mao ang pagpalig-on sa partido nga gitukod ni Davao City Mayor Sara Duterte-Carpio.
Giklaro ni Bautista nga angayang maghiusa ang tanang barangay aron mobarog ang partidong HNP ilabi na sa pagsuporta sa mga kandidatong gituboy ni Presidente Rodrigo Duterte ug ni Mayor Sara.
Si Digos City Mayor Joseph Peñas, provincial chair sa HNP-Davao del Sur, nagbutyag nga nalipay siya sa gipakitang suporta sa mga kapitan sa ubay-ubay nga mga barangay sa probinsiya human nagpadayag og tabang sa kandidatura niini pagka-gobernador.
Gihimo ang summit isip pagpangandam sa HNP sa probinsiya alang sa pagsugod sa lokal nga kampanya karong Marso 29. (Orlando B. Dinoy)