‘Cloud seeding’ himuon; pananum nga gihulaw luwason

DAVAO DEL SUR -- Gilaraw sa Department of Agriculture (DA) nga mohimo na og cloud seeding karong semanaha hangtud sa Mayo 25 aron maluwas ang mga pananum nga wa pa ma-harvest sa probinsiya.

Kini human nagdeklara ang kagamhanang probinsiyal og “state of calamity” tungod sa hulaw nga midamyos na og P161.2 milyones sa humayan ug maisan.

Gibutyag sa Davao Reduction Disaster Risk Reduction and Management sa DA pinaagi ni focal person Roy Jose Pascua nga base sa tahong nadawat niadtong Marso 20, mokabat na sa P155.6 milyones sa 3,657 ektaryang humayan ug P5.5 milyones sa 321 ektaryang maisan ang nalugi.

Gilantaw sa DA nga mousbaw pa ang kantidad sa damyos ilabi na sa mga lungsod sa Magsaysay, Bansalan, Kiblawan, Hagonoy ug Matanao, nga hilabihang naigo sa El Niño.

Human gipailawom sa “state of calamity” mahimo nang gamiton sa kagamhanang probinsiyal ang emergency funds aron matabangan ang mga mag-uuma.

Sayo niini, gibutyag sa provincial agriculture office ang pagpalit og mga backyard seedlings aron mahatag na ang inisyal nga ayuda sa mga apektadong mag-uuma.

Subay sa datos, anaa sa 7,600 ka mag-uuma ang naigo sa hulaw. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph