SA PAG-UBOS sa ihap sa mga priso sa Misamis Oriental Provincial Jail (MOPJ), dako kaayo og tabang niini ang mga abugado gikan sa Public Attorney's Office (PAO) sa Misamis Oriental ug mga doktor, nurse, ug dentista sa Northern Mindanao Medical Center (NMMC).
Atol sa pagpakayab sa nasudnong bandila adlawng Lunes, Marso 25, gipangunahan ni Misamis Oriental Governor Bambi Emano ang pagtunol og plake o plaque of appreciation ngadto sa mga dentista; Dr. Jocelyn Torrecampo sa Department of Health ug sa NMMC gipangulohan sab ni Dr. Ramon Moreno.
Kauban sa pagdawat mao sila si Pao head Nulila Garcia; Provincial Prosecutor Officer Atty. Irene Miso; Presidente sa Integrated Bar of the Philippines Atty. Eddie Cuaresma.
Matud ni Emano nga gipasalamatan nila kining mga abugado ug mga doktor nga kabahin sa ilang programa sa jail decongestion program tungod kay ang MOPJ prisuhan lamang unta sa 200 ka tao apan tungod sa kadaghang mosulod moabot kini usahay og 700 ka mga piniriso.
Apan sa programang jail decongestion nga gilakipan sab niining pre bargaining agreement ug uban nga proseso sa kaso naubsan kini karon.
“Ako silang gipasalamatan tungod kay sila ang nahimong kaabag namo sa jail decongestion. Dako og gikatabang kay kung wala sila moabot na sa 700 kapin ang binilanggo sa probinsya sige pa kadugangan kada adlaw unya atong bilanggoan gigama lang para sa 200 ka mga binilanggo nagsobra na 500 ug tungod sa jail decongestion anaa na lamang sa 300 kapin ang nabilin nga binilanggo sa atong probinsya karon,” matud ni Emano.