NATIONAL Youth Commission (NYC) uban ang Philippine National Police milusad sa ilang programa nga gitawag og Kabataan Kontra sa Droga at Terorismo.
Pinaagi sa programa, mahatagan og kahibawo ug magiyahan ang kabataan aron mahalikay sa pagsalmot sa mga progresibong sector nga modani kanila sa pagpasakop sa teroristang grupo ug illegal nga drugas.
Human gikonsiderar sa America ug gobyerno sa Pilipinas nga ang New People’s Army (NPA) ug ang mga political wing niini mga terorista, gilusad sa NYC ug kapulisan ang programa nga maghatag og kahibawo sa kabataan kon unsay ilang sangputan kon mosalmot sila niini.
Lakip na usab sa tukion ang dautang epekto sa paggamit sa illegal nga drugas nga unang programa sa administrasyon ni Presidente Rodrigo Duterte.
Ang ilang target mao ang dagkong mga unibersidad sa tibuok nasud.
Si Police Chief Supt. Rodel Seremonia sa Directorate for Police Community Relations sa Camp Crame nagkanayon nga daghan sa kabataan karon wa masayod unsay tumong ug tuyo sa pag ingganyo kanila sa mga progresibong grupo nga moapil sa ilang kawsa.
Daghan na sa mga tinun-an ang nangamatay sa dihang naengkwentro sa mga sundalo sa bukid kay diay miabin na sa armadong pakigbisog sa mga rebeldeng NPA.
Nipakita silag video sa mga sakop sa militante nga nahimong membro na sa armadong pakigbisog, apan gipatay ra usab sa dihang wa na sila makauyon sa kinabuhi niini.
Lakip sa gipakita ang pag-anunsyo ni Jose Maria Sison kalabot sa pipila ka mga militanteng pundok nga sakop sa komunistang grupo nga giila na usab sa gobyerno nga mga terorista.
Tinguha ni Seremonia nga malikay ang kabataan niini ilabi na ang mga tinun-an nga ang ilang mga ginikanan nagdamgo nga makahuman sa ilang pagtuon, apan na-recruit na sa NPA.
“Ang importante po sa kanila (student) ay ma educate sila and they are made aware kung ano yung evils of terrorism and communism and ill effect of drugs. Kung ano po yung dapat na ideal na estudyante at kabataan ngayon,” matod ni Seremonia.
Ang representante sa Sangguniang Kabataan Federation (SKF) sa syudad sa Sugbo nga si Julius Cuizon sa barangay Basak Pardo hugot nga mi suporta sa maong programa.
Matod niya nga angay masayod ang kabataan unsay epekto sa sigarilyo, ilimnong makahubog ug illegal nga drugas aron makalikay sila sa pag gamit niini lakip na ang pag salmot sa mga lihok protesta.
Si Sr. Supt. Royina Garma, hepe sa kapulisan sa syudad sa Sugbo, nagkanayon nga ila kining ipatuman sa pag bukas na sa klase sa Hunyo.
Ang ilang rumbo mao kadtong dagkong mga unibersidad sa dakbayan ang ilang target, usa niini ang University of the Philippines (UP), diin daghan ang mga terorista.
“Sana ma reach out namin lahat na universities sa Cebu City, yung mga malalaking university lang siguro. And then UP one the target kasi maraming estudyante at maraming scholars,” matod ni Garma. (AYB)