PANGALAN ni mayoralty candidate Junard Chan sa Lapu-Lapu City nalakip sa 53 ka mga kandidato sa tibuok nasud nga diskuwalipikado sa ilang kandidatura base sa dokumento sa Commission on Elections (Comelec) en banc pinitsahan niadtong Nobiyembre 28, 2018 nga nakuha sa iyang kaatbang, Rolando Patalinjug.
Samtang, si Chan nisalikway sa maong black propaganda ug mikuwestiyon kon tinuodang maong dokumento nga gipakatap, gani anaa ang iyang pangalan nga mga piliunong kandidato alang sa May 13, 2019 election nga official ballot sa Comelec website.
Ang kandidato sa United Nationalist Alliance, si Patalinjug, mipresentar kagahapon, Marso 27, sa ilang nakuha nga “Excerpt From The Minutes Of The Regular En Banc Meeting of the Commission on Elections held on November 28, 2018.”
Ang naasoyng dokumento kabahin sa “Non-use of the Amended Certificate of Candidacy (COC)...” diin nalakip sa listahan sa mga disqualified candidate si Chan.
Nagpasabot nga ang diskuwalipikado nga kandidato migamit sa daan nga COC nga kuwang sa Item No. 22 diin natala ang pangutana kon adunay gi-atubang nga kaso ang kandidato.
Nagkanayon si Patalinjug nga sa maong kalambuan advantage kini sa iyang kandidatura sa higayon nga mahinayon ang pagpapha sa pangalan ni Chan sa balota.
“Maayo unta nga modapig sila (Chan group) sa among grupo, kay usa ra among tumong (pagpukan sa mga Radaza),” pamahayag ni Patalinjug atol sa gipatawag nga press conference.
Si Pajo Barangay Kapitan Chan sa iyang bahin, nagduda kon authentic ang maong dokomento nga gipakatap sa iyang kaatbang kay kon siya gi-disqualify padad-an siya sa opisyal nga kopya gikan sa buhatan sa Comelec.
“Unsa man ni (dokumento)? Xerox copy... diin man ni, Quiapo ni gibuhat?,” kuwestiyon ni Chan sa photocopy sa maong minutes sa En Banc meeting.
Giwara-wara ni Chan ang iyang official copy sa iyang COC nga sakto ang dokomento nga iyang gigamit, sukwahi sa pangankon sa iyang atbang nga ang daan nga kopya maoy iyang giduso atol sa filing sa miaging Oktubre 2018.
Iyang gitataw nga taliwala sa palakaw sa pikas partido anaa ang iyang pangalan sa listahan sa official ballot alang sa May 13, 2019 National and Local Elections.
“Pagpanglingla ni sa mga tawo, tungod sa atong kakusog (kandidatura),” dason sa kapitan.
Nagtinguha si Chan nga mopadala og suwat ngadto sa Comelec En Banc sa pagpangayo og katin-awan sa mikatap nga dokumento aron mahunong ang maong propaganda.
Ang Comelec Lapu-Lapu mipahibawo nga wa pa silay nadawat og opisyal copy sa maong listahan sa na-disqualified nga kandidato. (FVQ)