591 drug surrenderers mitapos sa drug rehabilitation program

ANG Cebu Provincial Anti-Drug Abuse Office (CPDAO) ug Philippine Drug Enforcement Program (PDEA) 7 nagpadayon sa ilang hugot nga panagtambayayong sa drug rehabilitation sa mga lokalidad.

Matod sa PDEA 7 Facbook page, Miyerkules, Marso 27, mokabat sa 591 ka drug surrenderers sa lungsod sa Bantayan ang nakadawat sa ilang tagsa ka certificates of completion.

Ang matag certificate nagtimaan nga ang drug surrenderer nakakompleto sa iyang community-based rehabilitation program.

Si PDEA 7 Director Wardley Getalla nitambong sa completion ceremony nga gipahigayon sa Bantayan multipurpose gym.

Iyang gipahalipayan ang mga nakakompleto tungod sa ilang dakong nakab-ot alang sa pag-usab sa ilang tagsa ka kinabuhi nga layo sa ilegal nga drugas.

Gidasig ni Getalla ang mga surrenderer nga mopadayon sa ilang pag-usab di lang alang kanila, kon di sa tagsa nila ka pamilya.

Nitambong sa kalihukan sila si Mayor Ian Christopher Escario ug Captain June Tabigo-on, hepe sa kapulisan sa Bantayan.

Nipadala usab og mga representante ang Department of Health (DOH) 7 ug CPADAO atol gihimo graduwasyon sa rehabilitasyon sa lungsod sa Bantayan. (REV)