KAPULISAN sa siyudad sa Sugbo walay gitugotan nga maka-absent human giisa sa Police Regional Office (PRO) 7 ang full alert status kagahapon, Marso 27, tungod sa anibersaryo sa New People's Army (NPA) ugma, Marso 29.
Nadungan usab kini sa pagsugod sa opisyal nga kampanya sa lokal nga mga kandidato sa eleksiyon sa Mayo 13.
Matod ni Sr. Supt. Royina Garma, hepe sa Cebu City Police Office (CCPO), wala na silay gitugotan nga personnel nga maka leave sa ilang trabaho ug gipang-recall na usab kadtong naka leave na.
Wala hinuon mabalaka si Garma nga adunay himuon nga pagpangataki ang mga NPA sa siyudad sanglit giila ang dakbayan nga white area diin ang nagpasulabi mao ang mga militanteng pundok.
Tungod niini, gipangandaman nila ang posibling lihok protesta nga himuon sa mga reliyesta nga mag martsa sa kadalanan dungan sa pasalig nga ilang ipatuman ang maximum tolerance.
Awhag ni Garma sa mga raliyesta kung aduna silay himuon nga programa nga dili lang sila mobabag sa karsada nga maka balda na sa mga motorista.
“Sana they will just maintain respect sa ibang tao din na gagamit sa kalsada sana wag nilang isara kase duon magsisimula yung hindi pagkaka unawaan,” matod ni Garma.
Samtang, magtagbo karong adlawa ang mga police stations chief uban ang mga opisyal sa Commission on Election (Comelec) sa siyudad sa Sugbo aron hisgutan unsay mga angayan nga buhaton pinasikad sa balaod sa pagsugod sa kampanya sa local nga mga kandidato.
Atol sa pagsugod na sa pagpangampanya sa lokal nga mga kandidato ugma, nisaad kini nga mohatag sila og area security kung adunay mga rally sa kabarangayan sa dakbayan.
Wala pa hinuon makadawat og suwat-hangyo ang buhatan sa CCPO Director nga hatagan sila og security sa unang adlaw sa kampanya gikan sa mga lokal nga kandidato o partido sa pulitika. (AYB)