Mando ni Duterte: 17 anyos ibalik sa social welfare office

Mimando: Si Presidente Rodrigo Duterte mibutyag nga iyang gitawgan ang Lapu-Lapu City Prosecutor's Office nga bakwion ang hukom niini nga temporaryong nagpalingkawas sa 17 anyos nga suspek sa pagpatay kang Christine Lee Silawan. Gikompimar usab kini sa mao nga buhatan. (File Photo)
Mimando: Si Presidente Rodrigo Duterte mibutyag nga iyang gitawgan ang Lapu-Lapu City Prosecutor's Office nga bakwion ang hukom niini nga temporaryong nagpalingkawas sa 17 anyos nga suspek sa pagpatay kang Christine Lee Silawan. Gikompimar usab kini sa mao nga buhatan. (File Photo)

GIPAKIGKITAAN ni Lapu-Lapu City Prosecutor Ruso Zaragoza ang inahan sa 17-anyos nga gipansanginlang adunay kalambigitan sa kamatayon ni Christine Lee Silawan.

Kini aron personal nga hangyuon ang inahan sa lalaki nga ipa kustodiya na lang ang anak sa City Social Welfare Office alang usab sa seguridad niini.

DUTERTE NANAWAG

Gibutyag ni Zaragoza nga tinuod nga gitawagan siya ni Presidente Rodrigo Duterte kalabot sa nakab-ot nga desisyon sa piskaliya sa pagpabuhi sa 17-anyos gumikan kay wa masulod sa gitawag og warrantless arrest ang pagkustodiya niini sa NBI-7 sa wala pa gibalhin sa city social welfare.

Iya ra usab matod pa gipasabot ang Presidente sa ilang desisyon.

Apan nunot sa pagmando sa Presidente sa pagsikop og balik sa 17-anyos, mas gipili nila nga hangyuon ang inahan nga ipaubos na lang sa kustodiya sa city social welfare anak aron wa nay daghang kakulian.

Gibutyag ni Zaragoza nga mas maayo ra usab nga adto na sa city social welfare ang kustodiya sa 17-anyos sanglit alang kini sa iyang seguridad hilabi na nga daghan usab ang posibleng naglagot.

Usa ka konsehal sa barangay nga si Joseph Pangatungan nitabang kang Zaragoza nga mahimamat ang inahan sa 17 anyos aron iyang mapasabot sa sitwasyon sa iyang anak.

Giklaro ni Zaragoza nga sa higayon nga mauli na sa kustodiya sa city social welfare ang 17-anyos, magpabilin kini sa ilang pasilidad samtang gikatakdang resolbahon pa sa ilang buhatan ang kasong gisang-at sa NBI 7 batok niini.

Adunay pulis unya nga posibleng magbantay niini alang sa iyang kaluwasan.

WA GIPRISO

Wa na usab kinahanglana nga mopakanaog og laing kamandoan ang piskaliya kalabot sa pagpaubos sa 17-anyos nga CICL sa kustodiya sa city social welfare sanglit personal arrangement o kasabotan tali kanila ug sa inahan.

Ang prosecutors nihukom nga imbalido ang pagdakop sa 17 anyos kay wa na kini mahulog sa warrantless arrest.

Nakaplagan nga patay si Silawan, 16, niadtong Marso 11 sa buntag samtang ang 17 anyos gidakop Marso 16 sa gabii.

Ubos sa Rules of Court, ang warrantless arrest kon ang suspek nakahimo sa krimen o naghimo niini nga naa ang presensya sa kapulisan nga nitubag sa alarma.

Ang suspek masikop nga way warrant pinaagi sa hot pursuit operation, diin ang mga pulis dunay personal knowledge sa krimen nga nahimo sa suspek.

Si Vincent Isles, abogado sa 17-anyos, niingon nga way personal knowledge ang NBI nga ang iyang kliyente ang nipatay kang Silawan. Wa usay saksi nga nakakita sa pagpatay.

“Dili ingon nga gidetenir ni siya kon dili giprotektahan ang ilang welfare nga dili sila maunsa o madisgrasya. Kaning akoa is hangyo lang gyud ni atoa. Naa man puy kamandoan ang atong Presidente nga pabalikon o e re-arrest. Mao na lang ni nga nihangyo na lang ko sa inahan para dili na mataas ang proseso, ” pagpasabot ni Zaragoza.

Ang inahan nipasalig ug miuyon ra usab sa hangyo sa fiscal kaniya.

Nalipay na tuod unta siya nga nauli na sa ilang balay ang iyang anak niadtong Sabado, apan karon nga gipasabot siya kalabot sa kamandoan ni Presidente Duterte sa pagpasikop sa iyang anak pagbalik, hayan mas luwas ra nga adto na lang ang iyang anak sa kustodiya sa city social welfare.

Sanglit alang kaniya ang Presidete mao ang amahan sa nasod. Ang pag-uli usab sa kustodiya sa iyang anak ngadto sa city social welfare nagpakita nga way plano ang iyang anak nga mosibat sanglit hugot ang ilang baroganan nga inosenti kini sa pasangil nga gilabay ngadto kaniya.

Sayod usab siya nga daghan ang nasuko sa iyang anak sa pagkakaron hinungdan nga nisamot usab ang trauma niini.

Wa na kini motungha og balik sa iyang eskwelahan.

Hangyo lang niya sa Presidente nga dili hukman ang iyang anak sanglit igo ra gayud kini napasanginlan.

“President, ang ako lang hangyo nimo nga og unsa gali ang resulta diri sa ubos lang ba (sa Lapu-Lapu), ug unsay resulta sa mga proseso, mao lang say imong tan-awon dili lang sa ka mo judge og unsa dayon, dili ka modiritso dayon og desisyon,” nagkanayon ang inahan.

DUTERTE

Sa usa ka pagpamulong sa South Cotabato, si Duterte niingon nga iyang gimandoan ang prosector nga baliktaron niini ang hukom nga pabor sa 17 anyos.

“’Yung naka-patay na bata, ni-release. Tinawagan ko ‘yun. Sabi ko, i-recall mo ‘yung (Zaragoza) desisyon. Have the guy re-arrested. Piskal ako,” siya niingon.

Si Duterte niingon nga ang hot pursuit mahimong makonsiderar ning mao nga kaso.

“Ang hot pursuit can be applied ngayon kasi modern time. How can you make continuous support? Paano kung sumakay ng eroplano, naiwan ang pulis?” siya niingon.

Giangkon sa Presidente nga wa siya makauyon sa hukom.

“Di ako papayag ganunin ang bata. Binalatan mo ang bata, mahuli ka ilang days tapos palayain? Imposible ang hot pursuit na 24 hours lang . Six days, it’s still hot pursuit,” nagkanayon si Duterte.

Ang NBI nisang-at na og motion ngadto sa prosecutor’s office aron mahibalik ang 17 anyos nga suspek sa kustodiya sa social welfare office.

Gipaabot nga hukman kini ugmang adlawa, Biyernes, Marso 29. (SunStar Philippines)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph