Barrita: Amnesty sa simulation of birth

GIPIRMAHAN ni Presidente Rodrigo Duterte niadtong Pebrero 21 ang Republic Act No. 11222, ang Simulated Birth Rectification Act, nga naghatag og amnesty sa nakalapas sa simulated birth ubos sa Revised Penal Code ug magkorehir niini pinaagi sa mas sayon nga administrative adoption proceeding.

Daghang mga magtiayon nga di makabaton og anak nga ilang kaugalingon nga modangop sa pagsagop og bata sa laing inahan. Apan makuti ug taas ang proseso sa adoption nga moagi pa sa korte. Busa daghan kanila ang manglaktod pinaagi sa gitawag nga simulated birth.

Unsa man kining simulated birth? Ang magtiayon nga gustong makabaton og anak moduol sa usa ka babayeng mabdos, minyo man o dili,. Ilang hangyuon nga sagupon ang bata inig kahimugso niini. Kon mosugot, labi na kon kabus, ilang ibutang sa birth certificate sa bata nga sila mao ang ginikanan.

Sa laktod, ang simulated birth mao ang tampering of birth records. Ang nagsagop nga wa moagi sa saktong proseso sa hukmanan nagpatuo nga sila mao ang biological parents sa maong bata. Ang mahitabo mao nga mawagtang ang tinuoray nga identity ug status sa batang gisagop.

Lahi kini sa legal adoption kay ibutang man didto kinsa ang biological parents ug kinsa ang adopting parents. Mailhan gihapon sa bata ang iyang tinuod nga mga ginikanan. Kon madato unya mamatay ang biological parents, ang biological child, bisan gisagop na sa lain, makapanunod gihapon sa kabtangan sa biological parents.

Ang krimen nga simulation of birth gisilotan ubos sa Article 347 sa Revised Penal Code. Ang silot nga ipahamtang mao ang prision mayor kon pagkabilanggo gikan sa unom ka tuig ug usa ka adlaw hangtod sa 12 ka tuig ug multa nga di molabaw sa P1,000.

Apan ang RA 11222 naghatag og amnesty niadtong nakalapas niini ug korehian ang simulated birth sa bata kon ang simulation gihimo alang sa “best interest” sa maong bata.

Ang maong balaod nag-ingon, “a person or persons who, prior to the effectivity of this Act, simulated the birth of a child, and those who cooperated in the execution of such simulation, shall not be criminally liable for such act provided that the simulation of birth was made for the best interest of the child and that child has been consistently considered and treated by such person or persons his, her, or their own daughter or son.”

Kadtong nakahimo sa simulation of birth mahimong modangop sa usa ka administrative proceeding aron sa pagkorehir sa pagsagop sa bata, basta nga ang maong bata gikaipon pagpuyo sa maong tawo sud sa labing menos tulo ka tuig sa wa pa mo-epekto ang bag-ong balaod. (edbarrita@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph