DUNAY 31 ka mga inilang artista o celebrities ang anaa karon sa listahan sa Philippine Drug Enforcement Agency (PDEA) nga nalakip sa tigpayuhot sa gidiling drugas sa nasod.
Kini maoy usa usab karon sa gikabalak-an sa MalacaƱang tungod kay kining mga tawhana makahatag og dakong impluwensiya sa mga batan-on ilabi na ngadto sa ilang mga dumadapig o fans.
Ang nakapadugang og samot sa intriga, mao nga posibling pipila niini ang nakatabang sa pagpangampanya ni Duterte atol sa niaging piniliay.
Sa report sa PDEA, sagad ning maong mga celebrities mga kaabin sa party drugs dealer nga si Steve Pasion kinsa napatay sa mga tinugyanan sa balaod didto sa Manila niadtong Pebrero 2019.
Si Presidential Spokesman Salvador Panelo mipasalig sa publiko nga sa kampanya sa administrasyon ni Duterte batok sa illegal drugs wala silay pili-on basta aduna lay igong ebidensiya nga kapasikaran andam silang mopaluyo sa pagpasaka og kaso og motaral ning mga artistaha sa hukmanan.
Niadtong Marso 19, Martes, gipangyagyag ni Presidente Rodrigo Duterte ang mga pangalan sa 46 sa giingong 84 ka mga narco-politicians sa nasod. Kini aron paghatag og giya sa mga botante alang sa umaabot piniliay.
Ang maong listahan, sa gihapon, gikan sa PDEA - ang ahensiya nga gisaligan sa Presidente sa pag-validate sa mga gidudahang pulitiko.
Posibli nga aduna pay laing hut-ong sa mga narco-politicians nga ipangbutyag ang presidente ug dili usab halayo ang posibilidad nga duna pay laing mga Sugboanon nga malakip niini.
Dili kaha angay ug maayong ibutyag usab ngadto sa publiko ang mga pangalan niining mga artistaha, sama sa gibuhat sa presidente sa mga narco-politicians aron mahibawo usab ang publiko ug ang ilang mga fans? Uyon mo ani?