PORMAL na nga modawat og transaksyon ang opisina sa National Bureau of Investigation (NBI) sa Island Garden City of Samal (Igacos) sa Davao del Norte sugod niadtong Lunes, Marso 26.
Sumala ni NBI-Davao assistant director Jojo Balite nga dili na kinahanglan nga motabok pa sa dakbayan sa Davao ang mga taga Samal aron mokuha og NBI clearance.
“Makabenepisyo nito ang taga Samal, makatipid na sila sa oras, pera, dahil malapit lang sa kanila, hindi na kailangan nga pumunta pa sa NBI office ng Davao,” sulti ni Balite.
Si NBI director Dante Gierran ang mismong mitambong niadtong Biyernes, Marso 22, aron saksihan ang pag-abli sa maong buhatan sa Isla.
Nalipay si Gierran gumikan usa kini sa ilang paningkamot nga mapaduol ang serbisyo sa NBI ngadto sa katawhan nga layo sa regional nga buhatan.
Dili usab masukod ang kalipay sa Samalenyos gumikan sila ang makabenepisyo sa serbisyo sa NBI nga anaa na mismo sa ilang lugar. (Richy F. Nalagon)