TAGSATAGSANG mipugnit og tag 28 puntos sila si Stephen Curry ug Kevin Durant, ug gipatugbabawan sa Golden State Warriors ang Memphis Grizzlies, 118-103, kagahapon aron padayong huptan ang solong liderato sa Western Conference sa NBA.
Gawas sa iyang puntos, si Curry milangkat usab og 10 ka rebounds, midugang og 16 puntos si DeMarcus Cousins kinsa may siyam ka rebounds.
Sa pildirong Memphis, si Jonas Valanciunas mipahagsa og 27 puntos ug 13 ka rebounds nga gidugangan og 22 puntos ug walo ka assists ni Mike Conley.
Mipabuto og 9-0 nga rally ang Golden State, pito niini gikan ni Durant, aron sakmiton ang 100-92 nga labaw sa tunga-tungang bahin sa fourth quarter.
Sa first half, napahamtangan og technical foul sila si Valanciunas ug Durant.
Nagpahipi sa kapildihan mao ang tres ni Conley sa katapusang 2:50 segundos nga nahabilin sa second quarter nga maoy naghatod kaniya sa unang dapit sa scoring list sa franchise. Iyang naapsan ang iyang kanhi teammate nga si Marc Gasol.
Ang Warriors mosulong sa Minnesota karong adlawa.
Sa laing duwa, napahugtang sa Oklahoma City Thunder ang ilang paghupot sa ikapitong puwesto sa Western Conference pinaagi sa pagpukan sa Indiana Pacers, 107-99.
Si Paul George, kanhi sakop sa Pacers nga karon anaa na sa Thunder, mipabaha og 31 puntos, midugang si Steven Adams og 25 nga may 12 ka rebounds alang sa Oklahoma City.
Si Russell Westbrook, sa makausa pa, mikadlit og 17 puntos, 12 ka assists ug 11 ka rebounds nga maoy iyang ika-29 nga triple-double performance sa karon nga season.
Ang 24-0 nga rally sa Thunder sa third quarter maoy naghawan sa dalan paingon sa kadaugan ug wala na gyud kini molingi pa.
Importante ang maong kadaugan alang sa OKC kinsa napukan og kalima sa uwahing unom ka duwa niini.
Si Bojan Bogdanovic mipupo og 28 puntos. (AP, JBM)