USA ka susama og improvised explosive device (IED) ang nibuto diha sa dalan atubangan sa simbahan sa National Shrine of St. Joseph ug kilid sa Mandaue City hall, pasado alas 8, Huwebes sa buntag, Marso 28.
Dali nangabot ang kapulisan, dayon dali nga nihimoog pag-cordon sa lugar.
Anaa usab dayon niabot ang fire truck sa Bureau of Fire Protection sa syudad sa Mandaue, lakip na ang mga kawani sa Mandaue City Risk Reduction and Management Council, mga ambulance ug mga sakop sa Traffic Enforcement Agency of Mandaue (TEAM).
Anaa usab ang mga sakop sa SWAT, ug ang K9 unit sa kasundaluhan, niabot usab ang mga kawani sa Scene of the Crime Operatives.
Pipila ka minuto, adunay nadawat nga bomb threat ang tapad nga tunghaan, hinungdan nihimo og pagpa-ebakwit sa mga tinun-an, magtutudlo ug tanan nga staff sa tunghaan.
Nahitabo usab ang ikaduha nga explosion.
Ang maong panghitabo, nakapakurat sa makadiyot sa pipila ka mga niagi sa lugar ug sa mga adunay transaksyon sa Mandaue City Hall.
Apan ang maong mga panghitabo kabahin lang sa gihimo nga bomb explosion simulation exercise sa kapulisan sa Mandaue City Police Office.
Gipasabot ni Police Colonel Julian Entoma nga usa kini ka paagi aron pagpangandam nga dili gyud kini mahitabo sa syudad, ilabi na alang sa nagsingabot nga mga dagkong kalihukan dili lang sa syudad sa Mandaue, apan lakip na sa silingan nga mga dakbayan ug lungsod.
Sama nalang sa umaabot nga semana santa, ug ang National Youth Day, diin usa ang syudad sa Mandaue ang pahigayunan sa uban nga mga kalihukan alang sa libuan ka mga batan-on.
Paagi usab kini aron paghashas pa sa kaabtik ug kapabilidad sa kapulisan ug sa ubang mga sector sa pag-responde sa mga susama nga panghitabo.
Diin usa sa nabantayan nga buslot sa Commanding official sa maong simex, Police Lt. Colonel Ryan Devaras nga kulang lang sa pag-secure una sa ilang kaluwasan ang mga nirespondeng pulis.
Pasabot ni Devaras nga sa wala unta una ni-cordon ang kapulisan, giseguro una nila nga wala nay laing butang nga mobuto o posibleng dautan nga tawo nga mamusil kanila.
“We give them the rating 8, in which 10 is the highest and 1 is the lowest, nag-improve naman gyud ang atong personnel, but there is always room for improvement, and one of those they really need not to forget is also to secure the safety of the police personnel. How can you secure the people, if you yourself is not secured,” pagpasabot ni Devaras sa mga sakop sa media.