SA TINGUHA nga makatabang sa pagpangita og mga batan-on apan adunay potensiyal sa natad sa pamoksing, ang kanhi two-division world champion nga si Gerry Penalosa, ang mihulma karon og usa ka programa alang sa grassroots level aron pagdiskobre og laing umaabogt nga boxing superstar sa nasod.
Sa niaging adlaw, si Penalosa uban sa iyang asawa nga si Goody, mipahigayon og usa ka tryouts alang sa iyang programa nga giulohan og “The Next Boxing Superstar,” nga giabagan sa GerryPens Promotions ug sa ESPN5.
Kini usa ka tournament nga maghatag og kahigayonan sa mga bag-ong professional boxers sa nasod sa pagpakita sa ilang kalidad.
Ubos sa format, walo ka mga pinili sa matag division ang madala alang sa 1st season sa “The Next Boxing Superstar” nga gihashas gikan sa Luzon, Visayas ug Mindanao.
Ang tryouts ug auditions niadtong Martes gipahigayon diha sa Cebu City Sports Center boxing gym diin 12 ka mga batan-ong boxers nga nagagikan sa nagkalainlaing gym sa Sugbo ang misalmot.
“Aduna na tay napili nga upat dinhi. Moadto sab ta sa Davao City para sa Mindanao tryouts ug lain sab sa Luzon. Nya makompleto na ang mga slots, mao na ni sila ang moaway sa Season 1 sa atong program,” matod ni Penalosa human sa gipahigayong tryout nga giayudahan usab kanhi two-time world champion Dodie Boy Penalosa.
Dugang ni Penalosa nga ang unang season alang sa flyweight ug bantamweight division nga ipahigayon sa Mayo samtang ang finals adto na sa bulan sa Agusto.
Ang mga misalmot sa tryouts sa flyweights mao sila si Jim Paul Dignos, Arian Melgo, John Paul Gabunilas, April Jay Abne, Rolly Durong ug Eduardo Jimenez. Sa bantamweights mao usab sila si Rimon Rama, George Pasculado, Rafael Sueno, Kenan John Villaflor, Lenjun Retuerto and Braun James Wild.
Gibutyag usab ni Penalosa nga iyang sangpiton si senador Manny Pacquiao nga mopaluyo usab sa iyang programa. Gani usa si Pacquiao sa iyang konsultahon ug mohashas sa mga madala sa “The Next Boxing Superstar” nga ipasalida usab sa ESPN 5. Sunnex