PUTO, sir!” singgit sa babaye nga tindera og puto.
Hapit kada adlaw ikasugat ni Ruben ang babaye inigpauli niya sa ilang balay luyo sa munisipyo sa lungsod sa Amiraw. Kada buntag man siya molakaw ngadto sa merkado sa ilang lungsod aron pagpalit og Superbalita. Ug aron usab makapasingot. Usa ka kilometro ang gilay-on sa merkado. Retirado siya nga magtutudlo, sama sab sa iyang kapikas. Nangaminyo na ang duha nila ka anak ug sila na lang magtiayon ang nagpuyo sa ilang balay. Hinuon magduawan ang ilang mga anak ug mga apo matag Sabado ug Dominggo.
Ikanapulo na ni ka higayon nga nasugatan niya ang tindera og puto. Seksi ra ba. Bigot og lawas nga morag wa pay kuwarenta ang pangedaron. Mapahiyumon ang tindera. Apan niining pagsugat nila karong buntaga, morag napikal na si Ruben , kay bisan kadaghan na siya makabalibad tungod kay magdaut iyang tiyan kon makakaon og linubihan, gihagad gihapon siya. Wa gihapon makasabot.
Miurong si Ruben sa atubangan sa tindera sa daplin sa walang habig sa karsada. Miurong sab ang tindera nga nagtunol sa balde nga plastik nga gisudlan sa iyang tinda. Abi tingali sa babaye nga mopalit na og puto si Ruben. Gihikap niya ang mga pinutos og dahon sa saging sulod sa balde nga trayanggulo ang porma. Pulos puto-maya ang baligya sa babaye.
“Ang imo lang bingka ang akong paliton,” matod ni Ruben dihang miyahat siya. Mitutok siya pag-ayo sa babaye. Seryuso ang iyang tinan-awan.
Inosente ang hitsura sa babaye. “Puto ra may akong baligya, Sir,” sa babaye nga matinud-anon.
“Sunod gani, pagdala og bibingkang pinaugdo ug pinaliki, kay ipares nako sa akong budbod nga pinasinaw ug pinagahi,” ni Ruben nga matiawon.
“Hala, kalain ni, Sir!” sa babaye nga nahimalingka. Unya, misirit og lakaw.
Nahabilin si Ruben sa iyang nahimutangan nga mahimut-on.
Sukad niadto, dili na motan-aw kang Ruben ang tindera og puto kon magkasugat sila. Mao sad hinuon kini ang gusto ni Ruben, kay selosa gihapon ang iyang asawa bisan og mga tiguwang na sila. (KATAPUSAN)