GIBATI og kabalaka ug naalarma karon sa Senador Manny Pacquiao niining preparasyon sa nasod alang sa pag-host sa 30th Southeast Asian Games sa Nobiyembre.
Si Pacquiao, kinsa maoy chairman sa Senate committee on sports, nagkanayon nga kinahanglan tutokan kini karon og maayo sa mga sports officials sa nasod aron makab-ot ang kalampusan.
Ang SEA Games ipahigayon karong Nobiyembre 30 ngadto sa Disyembre 11, apan gikataho nga gihamok og problema ug panagbikil sa mga sports opisyal ang preparasyon niini ilabi na sa kakulang sa pundo.
Ang gikuyawan ni Pacquiao nga tingali og dili na hinuon mahinayon ang pagpahigayon niini sa nasod nga maghatag og dakong kauwawan.
Hangtod karon dako pa kaayo ang trabahuon sa main venue nga maoy ang New Clark City Sports Complex sa Tarlac.
Ang ubang events sa Manila, Subic ug Batangas ipahigayon.
Si Philippine SEA Games Organizing Committee (Phisgoc) chairman Alan Peter Cayetano sa niaging semana, hinuon mipasalig nga bisan pa man sa problema sa budget matigayon gyud sa nasod ang SEA Games.
Ingon niya nga ang dinalian karon nga pagpalusot sa 2019 budget makatabang og dako sa preparasyon ug pangandam sa matag duha ka tuig nga sporting events. (JBM)