MIABOT ngadto sa 79 ka mga teams nga nagagikan sa nagkalainlaing barangay ang mosalmot sa tinuig nga 2019 Minglanilla Mayor’s Cup (SK Summer League) Inter-barangay basketball tournament nga sugdan karong Dominggo.
Usa ka parada sa tanang mga partisipante uban sa ilang tagsatagsa ka mga musa ang ipahigayon sa dakong hawanan sa oval grounds nga sugdan sa alas singko sa hapon maoy mopatid sa pagbukas sa maong kalihukan nga gitambayayungan sa Sangguniang Kabataan ug sa Minglanilla officials nga gipangulohan ni Mayor Lani Pena.
Ang mga partisipante gibahin ngadto sa lima ka mga kategoriya. Kini mao ang Open nga may 16 ka teams, 21-under (22 teams), 17-under (20 teams), Minglanilla Basketball Association (Miba) 40-up (11 teams) ug Miba 39-under (10 teams).
Ang hamubong programa lakip na ang pagpili sa best in muse, best in uniform, early bird maoy pipila sa mga modayandayan atol sa opening ceremony.
Gawas ni municipal administrator Concordio Mejias nga aktibo usab sa maong kalihukan, miayuda sa pagadumala sila si Geraldine Canedo, Monching Cadiz, Jake Russel Abella ug John Jesson Gimenez.
Aduna usay volleyball tournament nga pagadumalahon ni commissioner Vannesa Juezan. (JBM)