NAGKALAINLAING mga nagpapili pagka-kongresista ang ginganlan ni Hugpong ng Pagbabago chief Davao City Mayor Inday Sara Duterte Carpio nga angayang himuong house speaker. Ginganlan ni Inday Sara sila si kanhi foreign affairs secretary Alan Peter Cayetano, kanhi Leyte congressman Martin Romualdez ug Marinduque Congressman Lord Allan Velasco. Apan karong bag-o giangkon ni Inday Sara nga dili siya maoy magbuot sa Ubos Balay-Balauranan ug motutok lang siya pagka-mayor sa Davao City. Nagpapili siya pag-usab sa pagka-mayor ug wala siyay kaatbang. Ang tinuod mao nga wa pay siguro nga modaug sa eleksiyon kining iyang mga gi-indosar pagka-house speaker.
Apan ang mas mahinungdanon alang kang Inday Sara nga dili mapili pag-usab pagka- speaker si Kongresista Pantaleon “Bebot” Alvarez nga iyang napa-lagpot pagka-speaker. Bisan si Presidente Duterte nga suod kaayo ni Alvarez mitalikod na kaniya. Si Alvarez nga usa sa mga lider sa Partido Demokratikong Pilipino-Lakas ng Bayan (PDP-Laban) nga magpapili pag-usab sa Davao del Norte’s first district gipa-atbangan ni Inday Sara kang Davao del Norte Governor Anthony del Rosario, ig-agaw ni Kongresista Antonio “Tonyboy” Floirendo, Jr. nga gikiha ni Alvarez og graft. Samtang si Alvarez suod nga higala ug alalay sa presidente kaniadto, si Floirendo usa ka financier ni Duterte sa mayor pa kini hangtud niadtong miaging presidential election. Dinhi sa Sugbo giklaro gyud sa presidente nga ang iyang suportahan mao ang kaatbang ni Alvarez. Gipaabut nga mahimo gihapong mayoriya ang ang mga alalay sa presidente sa kongreso. So, magpabilin gihapon nga hawak ni Presidente Duterte ang House majority nga maoy mosuporta sa iyang legislative agenda. Ambut og maka-impluwensiya ba si Inday Sara sa mga bag-ong sakop sa Ubos Balay-Balauranan?
•••
Gidakop pag-usab ang 17-anyos nga suspetsado sa pagpatay kang Christine Lee Silawan. Gibuhi-an ang suspek tungod kay suma sa piskal nga gidakop kini nga walay warrant of arrest ug dili usab matawag kini nga hot pursuit. Apan gitawag ni Presidente Duterte ang piskal og gisultihan nga ipabali ang iyang desisyon ug dakpon pag-usab ang suspetsado. Nagtuo ang presidente nga hot pursuit gihapon ang gihimo sa National Bureau of Investigation (NBI) 7 bisan kon pito na ka adlaw ang nakalabay usa madakop ang 17-anyos. Gihangyo sa piskal ang inahan sa suspetsado ug gidakop pag-usab ang batan-on.
Uyon ako sa awhag sa piskal nga suta-on sa mga tinugyanan sa balaud kon diin gayud gipatay sa Christine. Kay suma sa kapulisan wa siya patya sa dapit diini hikit-an ang iyang patay’ng lawas. Kinahanglan usab nga pangitaon ang death weapon kun ang kutsilyo nga gigamit sa pagdunggab ug pagpanit sa nawong sa biktima. Samtang husto ang gihimo sa mga tinugyanan sa balaud sa pagpangita sa dugang mga naghimo sa krimen importante usab kaayo sa pagkumbikto sa mga suspek/sinumbong ang pagpresentar sa death weapon ug ang dapit diin siya gipatay. (mannyrabacal1144@gmail.com)