DAGHANG mga tawo nga gustong moserbisyo sa katawhan pinaagi sa pagdagan sa eleksyon. Ang nakadaog ray makaserbisyo. Kadtong mga pildero maghuwat sa sunod eleksyon sa pamasin nga modaog aron makaserbisyo.
Mao man gyud ni sa usa ka demokrasya. Lahi niadtong mga nasod nga gigamhan sa mga diktador o kaha sa usa ka sistema sa panggobyerno nga usa ra ka partido ang magbuot kon si kinsa ang molingkod sa puwesto.
Kinahanglan una kang modagan ug modaog aron moserbisyo sa katawhan. Bisan unsa na lang ang buhaton. Mosayaw, mokanta, mopakatawa sa mga tawo ibabaw sa entablado o kaha paliton ang boto aron modaog sa eleksyon.
•••
Apan dunay mga tawo nga di matagbaw sa pagserbisyo. Bisan kon nahuman na ang ilang tulo ka sunod-sunod nga mga termino, gusto gihapon nga magpapili sa ikaupat nga higayon aron makaserbisyo sa katawhan.
Sama nila ni Konsehal Alvin Arcilla ug Sisinio Andales sa syudad sa Sugbo. Nahuman na ang ilang tulo ka sunod-sunod nga mga termino apan nagpasubli gihapon alang sa ikaupat nga termino kay gustong moserbisyo.
Matod nila, naputol ang ilang termino sa pagsuspenso nila sa Office of the President gikan sa Mayo 17, 2016 hangtod sa Hunyo 30, 2016. Apil sila sa 12 ka mga konsehal ug ni Mayor Mike Rama ug Vice Mayor Ed Labella nga gisuspensog unom ka buwan labot sa P20,000 nga calamity assistance sa mga kawani ug opisyal sa syudad human sa 7.2 magnitude nga linog ug super typhoon Yolanda sa 2013.
•••
Usa ka Allen Canoy, taga Sitio Fatima, Barangay Apas, Cebu City mipasakag petisyon sa pagkanselar sa certificates of candidacy (COCs) ni Arcilla ug Andales, mga sakop sa Bando Osmeña Pundok Kauswagan (BOPK), niadtong Oktubre 22 sa Commission on Elections (Comelec) Central Office tungod sa paglapas sa three-term rule.
Ang Comelec-Cebu City Office mipadala na sa resolusyon nga nagdeklarar nga si Arcilla di makadagan sa pagkakonsehal tungod sa paglapas sa three-term rule niadtong Marso 26. Wa pay resolusyon bahin ni Andales.
Ang desisyon di pa final. Mahimo pang mo-file og motion for reconsideration o kaha apelasyon. Ang pangutana, makaserbisyo pa kaha si Arcilla ug Andales sa mga Sugbuanon?