DAGHAN pa ang nabiktima sa gikatahapang tulisan nga napusilan patay sa off duty nga pulis dihang naaktohan nga nanulis sulod sa PUJ niadtong Marso 24 sa gabii sa dalan El Filibusterismo, Barangay Ermita, sa syudad sa Sugbo.
Nasayran kini sa kapulisan sa ilang pagsusi ug nakompirmar nga Hygie Mendez Mambiar, taga sitio Tabay Lawom, Barangay Tisa, nalambigit sa mga pagpanulis.
Matod ni Police Colonel Royina Garma, hepe sa Cebu City Police Office (CCPO), nga human mapatay si Mambiar, iya dayon nga gipasusi ang mga kaso sa tulis sa syudad sa Sugbo.
Dinhi nasuta nga pipila ka buwan na ang nakalabay, nakuhaan ug CCTV footage si Mambiar nga nanulis sa Barangay Basak Pardo, diin gitionan niyag armas ang biktima.
“Siya din ang tumira doon sa Basak Pardo. So, marami na ang naglabasan na nag identify siya positively ng victim. Inamin ng kapatid nya na involved sa robbery yung si Hygie na may na mention kung saan yung holdapan na siya yung tumira,” matod ni Garma.
Tungod niini, daghang mga kaso ang masulbad niadtong wa pa mailhi ang tulisan sa PUJ.
Giawhag usab ni Garma ang ubang mga biktima ni Mambiar nga moadto sa Carbon police station ug susihon ang picture niini lakip na ang video nga gihatag sa Barangay Basak Pardo.
Niadtong Marso 24 sa gabii napusilan patay ni Police Staff Sergeant Nemesio Dinopol si Mambiar sa dihang naaktohan nga nanulis sa usa ka PUJ nga adunay rota nga 04H.
Si Dinopol naa naglingkod sa front seat sa PUJ ug kita niya ang gihimo sa suspek hinungdan nga sa dihang nakuha na sa suspek ang mga butang sa mga pasahero, nipaila dayon siya nga pulis.
Inay motahan, nition na hinuon kini sa iyang armas apan giunhan sa pagpusil ni Dinopol.