GIBALIK na sa kustodiya sa City Social Welfare Office sa Dakbayan sa Lapu-Lapu ang 17-anyos nga child in conflict with the law (CICL) nga gipasanginlang adunay kalambigitan sa linuog nga pagpatay ni Christine Lee Silawan, Huwebes, Marso 28.
Mismo si Lapu-Lapu City Prosecutor Ruso Zaragoza ug abogado sa CICL, manlalaban Vincent Isles, niuban sa paghatod og balik sa batan-on sa Homecare Center sa Dakbayan sa Lapu-Lapu.
Niuban usab sa 17-anyos ang inahan niini dihang miabot sa pasilidad alas 9:30 sa buntag.
Giklaro ni Zaragoza nga ang pagbalik sa CICL sa Homecare Center mao ra ang pagpaubos niini sa “protective custody” ug wa gisikop nunot sa kasong iyang giatubang.
Gipahibawo ni Zaragoza nga karon nga nabalik na sa kustodiya sa social welfare ang 17-anyos, magpadayon na usab sila sa ilang preliminary investigation sa kasong murder nga giatubang niini.
Ubos sa proseso, gikatakdang molanat og 60 ka adlaw ang paghuman sa usa ka preliminary investigation sa prosecutor’s office apan gibutyag ni Zaragoza nga posibleng di nila tiwason ang 60 ka adlaw ug mopagawas na og resolution.
Aron masiguro ang kaluwasan sa 17-anyos, nihangyo si Zaragoza sa Lapu-Lapu City Police Office sa pagbutang og pulis sa Homecare Center 24 oras.
Bilin lang ni Zaragoza sa mga staff sa Homecare center nga di paduawan og mga sakop sa National Bureau of Investigation (NBI 7) ang suspek.
Nagpasalamat usab si Zaragoza kang manlalaban Vincent Isles, abogado sa suspek, ingon man ginikanan niini nga misanong sa iyang hangyo.
Si Isles nipadayag nga wa siyay nakitang sayop sa pagpaubos sa iyang kliyente sa kustodiya sa city social welfare.
Matod ni Isles nga mas makaayo ra usab kini sa iyang kliyente sanglit dili layo ang posibilidad nga sakyan unya sa ubang tawo ang kamandoan ni Presidente Rodrigo Duterte sa pagsikop niini nga magbutang na hinuon sa ka-peligro sa kaluwasan sa iyang kliyente.
Wala usay nakitang problema si Isles kon ugaling adunay mga pulis nga magbantay sulod sa pasilidad sanglit alang kini sa kaluwasan sa iyang kliyente. (GCM)