CATARMAN, Northern Samar -- Lima ka sibilyan ang gipamusil sa gituohang mga sakop sa New People's Army (NPA) atol sa pag atake sa Victoria Municipal Police Station sa Northern Samar.
Ang lima ka sibilyan gidala sa Allen District Hospital apan gibalhin sa Northern Samar Provincial Hospital.
Ang lima giila nga sila si Samuel Illustre, 52, kawani sa LGU San Jose; Wilta Tejero, 74; Wilta Tejero Jr, 44; Shai Sanchez, 17; ug Mariquel Sanchez, 53, pulos taga San Jose, Northern Samar.
Ang lima ka biktima nakit-an sa kapulisan sa Catarman samtang naginspeksyon sa mga tambalanan.
Gisugilon sa mga biktima nga, alas 4 sa kadlawon, sakay sila sa usa ka awto gikan sa San Jose paingon sa San Isidro Northern Samar.
Pag abot sa Barangay Libertad sa lungsod sa Victoria, gi flag down sila sa mga nakababag nga mga armadong grupo nga gituhoang blocking force sa NPA.
Nakahimo sa pag maneuver ang drayber sa awto aron makaeskapo sa lugar apan gipamusil hinuon kini.
Si Illustre naigo sa iyang paa, si Wilta naigo sa likod nga bahin sa liog, si Wilta Jr. naigo sa likod ug si Shai naigo sa likod samtang wala maunsa si Mariquel.
Gipangdala sa mga concerned citizen ang mga biktima sakay sa van paingon sa Allen District Hospital apan gibalhin sa Northern Samar Provincial Hospital.
Mimando na karon si Police Regional Office (PRO)-Eastern Visayas Director Dionardo Carlos sa padayun nga paglutos sa mga responsable sa pag atake.
Alas 3:30 ganinang kadlawon, giatake sa kapon kun kulang 50 ka NPA ang Police Station sa Victoria.
Sakay sa duha ka forward trucks ang mga NPA diin daghan nga babayeng NPA ang giingong niapil sa pag atake.
Ang police station dunay 15 ka personnel ug dali nga nakapwesto sa roof top aron depensahan ang ilang stasyon batok NPA.
Tulo ka NPA ang namatay, duha ka pulis ang samdan ug usa ka NPA ang nasikop nga giilang si Aljon Tamuyang Cardenas, 18.
Narekober usab sa kapulisan ang mga tag-as nga kalibre sa armas gikan sa NPA sama sa M60 light machine gun ug duha ka M16 rifles ug mga bala.
Nahuman ang pinusilay pasado alas 6 sa buntag.
Gidayeg naman ni Carlos ang kaisog ug determinasyon sa kapulisan sa Victoria sa pagdepensa sa ilang kampo.
Nakaalerto na usab ang tanan stasyon sa kapulisan ug kasundalohan.