GIPANGLANTAWAN sa direktor sa Philippine Drug Enforcement Agency (PDEA)-Central Visayas Attorney Wardly Getalla nga mosiaw ang suplay sa ilegal nga drugas ning pagsugod na sa kampanya sa lokal nga mga kandidato.
Matod ni Getalla nga ang ilang ahensya hugot sa ilang monitoring sa posibling pagdagsa sa suplay sa shabu sa Central Visayas gani ang tanang intelligence unit sa kapulisan ug militar.
Lakip sa ilang i-monitor ang mga kandidato nga nigamit og kuwarta gikan sa ilegal nga drugas apan matod ni Getalla nga sa pagkakaron lisud motumbok kon kinsa nga kandidato ang nalambigit sa ilegal nga drugas kon wala moagi sa subsub nga validation.
Mas gipahugtan pa usab nila ang pagbantay sa mga pantalan sa Region 7 diin didto posibling ipaagi ang suplay sa ilegal nga drugas.
Samtang, gipahihayon usab sa PDEA, Biyernes, Marso 29, ang surprise drug test sa mga drayber sa publikong sakyanan sa Kamagayan sa Dakbayan sa Sugbo ug North Bus Terminal sa Dakbayan sa Manaue uban ang Land Transportation Office, Land Transportation Franchising and Regulatory Board ug ang Mandaue City Police Office kabahin sa Oplan Harabas.
Matod ni Getalla nga dungan kini nga kalihukan sa PDEA lukop nasud aron masiguro nga wala'y mga driver nga tig gamitan sa ilegal nga drugas.