MIMANDO karon ang hepe sa Police Regional Office 7 Police Brigadier General Debold Sinas sa kapulisan sa syudad sa Sugbo pag imbestigar sa nahitabong pag-vandal sa atubangan sa UP Oblation Square sa UP Cebu Campus sa dalan Gorordo Avenue sa Barangay Lahug.
Matod ni Sinas nga usa sa ilang sutaon kinsa ang nag hugaw-hugaw sa atubangan sa UP aron mapasakaan nilag kaso.
Apan nagduda sila nga mga tawo ra kini nga adunay kasuko sa mga walhong grupo diin daghang mga aktibista nga naa nagtungha sa UP.
Bisan pa man niini dili angay nga mohimog pag hugaw-hugaw ang bisan kinsa sa usa ka pasilidad sa gobyerno sama sa tunghaan sa UP Cebu campus.
Ganinang buntag nabantayan sa mga gwardya sa UP ang gisuwat nga "CPP-NPA-NDF mga salot".
Nakit-an ang maong vandal atol sa ika-50 nga anibersaryo sa pagkatukod sa New People's Army.
Gi kondinar usab sa mga militanteng pundok ang pag vandal sa UP ug padayon ang ppagpamasangil sa mga tinun-an nga sakop sa progresibong grupp nga mga membro sa New Peoples Army.
Sa ilang opisyal nga Facebook page, gikondenar sa Nagkahiusang Kusog sa Estudyante (NKE) UP Cebu chapter ang pag- vandal sa oblation square sa maong tunghaan.
Gikondenar nila ang pag "red-tagging" sa mga tinun-an sa maong tunghaan.
Ila sad gipakasad-an ang administrasyon ni President Rodrigo Duterte ug ang Armed Forces of the Philippines nga gidudahan nilang maoy nagpasiugda sa maong pag-vandal.
"Only cowards like Duterte and his AFP would involve themselves in baseless and malicious tactics like this. But we must not be discouraged for this only means that our ongoing fight for national liberation is effective in shaking the oppressive ruling elite in their seats," matud pa sa NKE UP Cebu, sa usa ka pamahayag. (with JKV)