NAKAALERTO ang tanan police station sa probinsya sa Misamis Oriental niining kasaulogan sa ika-50th anibersaryo sa New People's Army ug dungan sab sa pagsugod sa kampanya alang sa umaabot piliay sa Mayo 2019.
Gibutyag ni Police Colonel Rolando Destura kinsa provincial director nga 24 oras nga nakaalerto ang kapolisan sa probinsya.
Wala pay nadawat nga mga hulga sa pagpang-atake apan wala sila magkumpiyansa niini.
"Naa mi mga nadawatan kining ilang mga kalihokan ug tapok wala namo gi understimate kay basin mo strike sa mga police station," matud ni Destura.
"Kagahapon pa full alert na kami with Philiphine Army. Ready na ang among mga security forces," matud ni Destura.
Gipahimangnoan sab niini ang iyang mga sakop nga mag-expect pa og grabe ug kung aduna man matigayon dili na maghulat og reinforcement ug molaban kutob sa mahimo.
Gihangyo sab niini ang kapolisan nga mosukol ug dili mosurender ug protektahan ang kaugalingon lakip ang police station.
"Dili mi ga reinforce, dili mi gadugang og bala apan e encourage nga maprotektahan ang katawhan ug police station," butyag niini ug mipaabot og mensahe.
Mapasalamaton si Destura sa katawhan sa kabukiran nga kanunay nga gapahibalo sa mga lihok sa walhong grupo.
"Mapasalamaton kami sa katawhan sa kabukiran nga gahatag og inpormasyon kanamo. Mao ni nga mga senyales nga modaogay ang atong gobyerno kay direct cooperative na ang mga tao sa kabukiran sa paghatag og inpormasyon lakip atong local chief executive nga gasuporta kanato," matud ni Destura.