MAY mga tunok sa iyang mata nga mogilak kon matandangan sa adlaw,
tunok sa kahoy nga milipang diha sa iyang dughan.
Kon mapuno siya sa pagbati tungod sa kalipay o kasakit,
dali ra kaayong mangatagak ang mga luha.
Mga gagmayng lisong mangahulog ug gipadpad sa way tumong nga hangin
ngadto sa mga dalan-dalan, mga sapnit, ug mga umahan.
May moturok ug mahimong dagkong kahoy nga pinasagdan, dagkong gamot ug labong nga mga dahon.
May mga bata nga mokatkat sa punoan
naghimo-himo og kaugalingong pinulongan.
May mga salag sa mga langgam nga manag-awit bisan pag way tigpaminaw.
May mga nahigugma nga nasaag ug mikatkat sa iyang mga sanga
ug naghikog nga walay hinungdan.
Siya, kadtong labing una, kadtong migasa sa mga luha,
giangkon sa lasang, mitipon sa lasang ug nakalimtan.