WALO ngadto sa siyam ka oras nga wala’y tubig ang masinati sa pipila ka mga konsumidor sa Metro Cebu Water District (MCWD) sa Dominggo, Marso 31 ug Martes, Abril 2.
Duha ang mga hinungdan: way kuryente ug mag-ilis ug bag-ong tubo.
Walo ka oras nga way tubig ang masinati sa Barangay Canduman, Cubacub, Tawason, Pagsabungan, Casili sa Dakbayan sa Mandaue. Apil niini ang Barangay Pit-os ug Bacayan, sa dakbayan sa Sugbo.
Kini tungod kay dili magamit ang atabay nga nag-supply og tubig sa maong mga dapit kay way kuryente.
Magsugod kini alas 8 sa buntag hangtod alas 4 sa hapon.
Samtang siyam ka oras nga way tubig sa Maglasang Road, Cansaga, Lamac, Consolacion, inig ka Martes, Abril 2, tungod sa bag-ong tubo nga ikonektar sa maong dapit.
Diin magsugod kini alas 10 sa buntag hangtod alas 7 sa gabii.
Giawhag ang apektado nga mga konsumidor nga magpundo og tubig ingon man modaginot kini.
JACLUPAN MOKRITIKAL
Gipanglantawan nga moabot na sa kritikal nga level ang Jaclupan dam karong weekend human nikanaug ang supply niini ngadto sa 17,000 cubic meters sa Biyernes, Marso 29.
Gikompirmar sa tigpamaba sa MCWD Charmaine Rodriguez-Kara nga anaa na lang sa 17,900 cu.m. matag adlaw ang ma-supply sa maong dam.
Dugang niya nga moabot na unya sa katunga sa normal nga 33,000 cu.m. ang mahatag nga supply sa Jaclupan.
Kini nagpasabot nga kon moubos pa sa 16,500 cu.m., mao na kini ang kritikal nga level sa dam.
Wa nay ma-supply nga tubig ang Buhisan dam tungod kay wa na’y mogawas nga tubig sa discharge pipe niini.
Lakip sa maapektohan niining pag-ubos na usab sa supply sa Jaclupan dam ang dakbayan sa Talisay, Bulacao, Inayawan, Cogon Pardo, Pardo, Kinasang-an, Basak San Nicolas, Basak Parko, Quiot, Mambaling, N. Bacalso Ave., Duljo sa Dakbayan sa Sugbo.
Maapektuhan usab ang San Nicolas Proper, Sawang Calero, Suba, Pasil, Pahina San Nicolas, Pahina Central, Kalubihan, Sanciangko, Ermita, Colon, Kamputhaw, Sto. Niño, Parian, San Roque ug Tinago.
Maigo ang North Reclamation Area, Kamagayan, Tejero, T. Padilla, Lorega-San Miguel, Carreta, Tisa, Punta Princesa, Labangon, Banawa, Salvador, Katipunan, Guadalupe, Capitol Site, OPRRA, Calamba, Sambag 1 ug 2, Sta. Cruz, Cogon Ramos, Zapatera, Day-As, ug San-Antonio sa dakbayan sa Sugbo.
Ang grabeng init nga dala sa panahon sa ting-init ug El Niño phenomenon mao ang rason nga nagnihit ang tubig karong panahona.