3 drayber sa taksi positibo sa druga

TULO ka mga taksi drayber ang nagpositibo sa paggamit og ilegal nga druga atol sa gipahigayon nga Oplan Harabas, usa ka nationwide drug testing pangulohan sa Philipine Drug Enforcement Agency (PDEA)-Davao sa Francisco Bangoy International Airport Biyernes, Marso 29.

Sa paghinabi uban kang PDEA Davao director Antonio River, 297 ka mga drayber naghatag sa ilang sampol nga ihi alang sa surprisang mandatory drug testing ug ang tulo ka drayber nga inisyal nga nagpositibo mopailawom sa confirmatory test aron nga ibalidar ang resulta.

Gitarget sa PDEA ang mga drayber sa public utility vehicles aron nga maseguro nga naa sila sa maayong panghunahuna aron nga malikayan ang mga aksidente tungod kay ubos sila sa impluwensiya sa ilegal nga druga.

“This is the program of our Director General Aaron Aquino for all the driver and the transport sector. It is part of PDEA’s harm-reduction program. Meaning it is part of our information dessimination to warn the public not to engage in illegal drug especially the drivers to ensure the safety of the commuters,” tin-aw ni Rivera.

Gitug-an niya nga kini na ang ikaduhang higayon nga naglusad og samang kalihukan.

Kahinumdoman nga niadtong milabay nga tuig, naghimo sila og seminar og drug testing sae Davao City Overland Transport Terminal (DCOTT) nga nagtarget sa mga drayber sa bus ug public utility jeepney.

Gibutyag ni Rivera nga gihimo nila ang drug testing sa airport kay dinhi magtapok ang mga drayber aron nga mokuha og pasahero.

Gawas niini, iyang gipasalig nga duna pay daghang mga drug testing ang himuon sa tibuok rehiyon isip kabahin sa gipalig-on nga kampanya batok sa druga sa kagamhanan.

Ang Oplan Harabas, maoy usa ka programa nga gipaluyohan sa Philippine National Police (PNP), Land Transportation Franchising and Regulatory Board (LTFRB), National Bureau of Investigation (NBI), Civil Aviation Authority of the Philippines (Caap), Philippine Coast Guard (PCG), Department of Health (DOH), ug Land Transportation Office (LTO).

Samtang ang mga pangalan sa drayber nga gisumite ngadto sa LTO ug LTFRB alang sa posibleng silot. (JCR)