PATAY nang nahidangat sa Robillo Hospital sa Calinan, dakbayan sa Davao ang 17-anyos nga lalaki human nga gidunggab sa gikalalis, alas 7 sa gabii niadtong Huwebes, Marso 28.

Giila ang biktima nga si TJ Dela Cerna Buchan, molupyo sa Purok 1C, Talomo River, Calinan, siyudad sa Davao.

Kini base sa taho nga nadawat sa kapulisan sa Calinan Police Station gikan kang Larry Dela Cerna Buchan nga molupyo sa nahisgutang dapit.

Samtang ang suspek nailhan nga si Manny Penas Roble alyas Blokey, 18, laborer ug molupyo sa samang lugar.

Nasayran nga alas 7 sa gabii sa maong adlaw, init nga nagkalalis ang biktima ug suspek.

Apan kalit lang nga nihulbot og hinagiban ang suspek dayong dunggab sa biktima.

Daling gihatud ngadto sa nahisgutang balay tambalan ang biktima kon diin gideklara siyang dead on arrival alas 8:55 sa gabii sa nag-atiman nga doktor nga si Dr. Ma. Alexa Paula Gevera.

Hinuon ang suspek nadakpan sa nagrespondeng mga pulis kon diin pasakaan siya og tukmang kaso.