MOPAHIGAYON og duha ka sunodsunod nga motocross events ang MS Motosuit ning panahon sa ting-init sa amihanang dapit sa Sugbo.
Karong Abril 14, ipahigayon sa MS Motosuit ang ika-21 nga edisyon sa Calambua Motocross Cup sa Calambua, San Remigio unya mosunod niini ang 2019 Mayor Joven Mondigo Motocross Inviational karong Abril 28 sa Medellin.
Nagkanayon si MS Motrosuit boss Lou Ornopia nga sama sa gipasiugdahan niyang mga lumba kaniadto, naglaom siya og kulbahinam nga mga aksyon ning higayuna nga makahatag og saktong lingaw sa mga tumatan-aw.
Kapin sa 50 ka wala’y kahadlok nga riders ang mopakita’g aksyon ning duha ka events nga adunay racetrack nga idisensyo basi sa international standard.
Lakip sa bantugang riders nga mangapil mao sila si BJ Pepito, Jonjon Adlawan, John Flores, Venil Abellar, Jonathan Cuyos, Seigfred Ornopia, Jonas Adlawan, JC Obligado, Gyle Aguilar ug uban pa.
Ang mga kategoriya nga kombatihan mao ang pro open, expert, peewee 50 cc and 65cc and mini 85cc, beginners, local enduro, open enduro, executive A, B and C, novice, ug intermediate.
Kaabag sa MS Motosuit sa pagpasiugda ning duha ka events mao ang F&FO motor parts, Cebu Newstar, RMO motor parts, JCO motor parts, NF Enterprises, A Plus, ug Melvin Jeroy sa SNR Motomaze.
Gisuportahan sab kini nila ni congressman Benhur Salimbangon, provincial board member Sun Shimura, vice mayor Al Pestolante, vice mayor Erwin Agustin, Wenrec de la Peña, police Maj. Mariano de la Peña Jr., Juan Jubay clan, and Evelyn Concillado. Engr. Susan Ornopia, ug J/Supt. Felipe A. Montejo. (ESL)