KINING katahap magpataka og tugdon. Sa sayo pa nag-omido ang pag-aslom sa politikanhong relasyon sa dihang gisultihan ni Vice Gov. Agnes Magpale si Gov. Junjun Davide sa giingong pangwarta sa Cuatro Alas nga gibaliwala lang sa gobernador. Nahilot sa dihang mios-os si Davide ug gipaon si Magpale. Apan dili makalihay si Magpale kon dunay anomalosong transaksyon kay ang tanang gahin moagi man kaniya isip presiding officer sa hunta probinsyal. Daghang mga transaksyon nga ang mga magbubuhis makatuaw kon para ba komisyon o eleksyon.
Consultancy services nga P57M sa 20 ka andanang resource center nga unta mahimo man sa taga engineering office. Kanhi opisyal sa Presidential Anti-Corruption Commission nga si Rick Ramos mitataw nga overpriced kay sa floor area nga 1,000 metro kwadrado mogasto og dili mominos sa P50 milyon matag hawanan pil-on og 20 ka floor area mokabat lamang og P1 bilyon, dili P1.3 bilyon basi sa gigahin nga mangutang sa DBP og P1.5 bilyon. Dinali-dali ang pagsubasta nga dili prayoridad. Ipugos gyud ang pagpatukod bisan sa abiso sa National Historical Commission of the Philippines nga dili hilabtan ang National Historical Landmark sulod sa Capitol Compound.
Consultancy services nga P26.2 milyon risk reduction plans nga mahimo man unta sa taga disaster office. Gipaburot ang presyo sa Bobcat nga sakyanan sa disaster nga P12 milyon. Duha ka speedboat nga ang usa nalunod sa kadagatan sa Talisay. Disaster equipments nga daghang nangalata sa opisina. Katingalahan nga consultancy seminar ug masteral. Pag-award sa P9 milyon pagpalit og tambal sa local suppliers. Anomalosong bidding sa pag-hire og security provider. Kurapsyon sa Penro. Suborno gikan sa sand and gravel business.
Nangilkil sa mga fish dealers gikan sa Zamboanga Peninsula ug sa mga tighakot sa balas, graba ug anapog. Ekipos ingon man sa pagpagawas og salapi alang sa mga mag-uuma nga wala kapusli. Subasta sa mga procurements nga dili importante. Pinili nga kontraktor sa P252 milyoon sa heavy equipments sa kalit nga nag-joint venture nga Conequip ug RDAK nunot sa pagpaburot sa presyo. Pagbaligya sa CICC nga P300 milyon nga migasto ang katukoran og dul-an sa P1 bilyon nga gihimolbolan sa mahalong mga butang. Kwestynabling pagpa-release sa butane products ug equipments nga nasakmit gikan sa dealer nga didto ipundo sa Balili property. Gipangkawat usab ang mga culverts. Sanglit nagsingabot ang piniliay dunay gahin nga P300 milyon pagpaayo sa 25 ka kilometro nga kadalanan ambot og naimplementar ba.
Pagpalit sa 51 ka mga sakyanan tingali maayo ang katuyoan apan gipaburot ang presyo. (csa_1156@yahoo.com / 09064648954)