GIDIS-armahan ang pulis nga hubog nga nangulata sa iyang kapuyo sa sitio Purok 4 Upper, Barangay Kamputhaw, syudad sa Sugbo.
Gawas sa giingong pagpangulata, nanion pa kini sa duha ka mga menor de edad.
Tungod niini, gipasakaan og daghang mga kaso ang pulis niadtong Huwebes sa hapon.
Si Police Staff Sergeant Alejandro Sultan, kinsa nadestino sa banda sa Police Regional Office (PRO) 7 Band, gidakop sa Abellana Police Station human sa hitabo niadtong Huwebes sa kaadlawon, Marso 28.
Matod ni Police Major Eduardo Sanchez, hepe sa Abellana police station, nga nadawat nila ang alarma nga adunay pulis nga nanion sa mga tawo sa Kamputhaw.
Ila dayon nga gipaalarmahan gipaadtuhan sa mga pulis.
Giingong nag-away sila sa iyang kaipon nga si Niña Janen Orquiza nga miresulta sa iyang pagpangulata kaniya.
Apan sa dihang nakita niya ang duha ka mga lalake nga nag tan-aw sa ilang panag-away, sila na usab ang giatubang ug gipangtionan.
Unang gipasanginlan nga kakunsabo sa iyang kapuyo ang 21 anyos nga si Niño Raye Cabañero.
Iyang gibira-bira ang bukton ug gipasanginlan pa nga namaligyag armas.
Ang 15 anyos nga lalake nga mipalit lang og tubig gitionan tumong sa ulo sa gibitbit niini nga armas.
Matod sa inahan sa 15 anyos nga lalake, Evelyn Atis, nipalit lang og tubig ang iyang anak apan gibira ang abaga ug dayong tion ni Sultan sa dala niini nga armas sa ulo.
Tungod sa hitabo, way kabutangan sa kahadlok ang gibati sa iyang anak nga niadtong tungora nagtuo na nga mamatay na siya.
“Sus, kon nakablit pa to, patay gyud akong anak ato kay diri man sa ulo ang pagtion niya sa armas. Hadlok kaayo akong anak,” matod ni Atis.
Nisaad si Atis nga iyang pasakaan og kaso si Sultan ug di siya mahadlok hangtod nga matangtang kini sa serbisyo.
Giingong daghan na kini gireklamo sa Barangay Kamputhaw apan nahilot lang.
Patong patong nga kaso angg ipasaka sa Abellana police station kang Sultan.
Mga kasong slight physical injury, violence against women and children, grave threat, child abuse, drunkenness, illegal possession of firearms ug kalapasan sa Commission on Elections (Comelec) gun ban ang iyang giatubang.
“So, mag atubang siyag criminal case as well as admin case, grave misconduct,” matod ni Sanchez.
Si Police Brigadier General Debold Sinas, director sa kapulisan sa Central Visayas, nimando dayon sa pagpadis-arma kang Sultan ug parelibohan sa katungdanan.
Matod niya nga kasong criminal ug administratiba ang atubangon ni Sultan. Mag-atubang og dakong silot nga ikataktak ni Sultan sa serbisyo.
“Because of this, lalo na sa instruction ni Presidente (Rodrigo Duterte) nga dili na mag huboghubog ang pulis, basig amo ning tagaan og harsher penalty. Hopefully, dili siya i-recommend og dismissal, kay kon i-estorya sa amoa nga i-dismiss, i-dismiss gyud namo siya para mahibaw-an sa tanan nga wala mi gikiling-kilingan o wala mi giprotektahan,” matod ni Sinas.
Gisuwayan pagkuha sa iyang habig si Sultan sulod sa detention cell sa police station apan nagdumili kini pagtubag sa mga pangutana.