ANAA sa kustodiya sa City Social Welfare and Services (CSWS) sa Dakbayan sa Mandaue ang unom sa pito ka mga bata nga nailo sa maglive-in partner nga sila si Ricardo Avenido ug Agnes Pugoy.
Ang duha gipamusil patay sulod sa ilang pinuy-anan niadtong Huwebes sa kaadlawon, Marso 28, sa Sitio Lapyahan, Brgy. Labogon, Dakbayan sa Mandaue.
Mao kini ang gitug-an ni Jessie Perez, pangu sa CSWS sa Dakbayan, dungan sa pagbutyag nga kinahanglan nga ipaubos sa stress debriefing ang mga bata sanglit nakakita sa pagpatay sa ilang mga ginikanan.
Ang edad sa kimaguwangang anak 13-anyos samtang wala pay usa ka tuig ang kinamanghuran.
Usa sa mga igsuon sa mga bata wa sa kustodiya sa CSWS gumikan kay atoa sa Mindanao.
Tulo sa mga bata ang giingong anak nila ni Avenido ug Pugoy samtang ang laing tulo anak usab ni Pugoy sa laing lalake.
Gipasabot ni Perez nga human mapaubos sa stress debriefing ang mga bata, ilang pangutan-on ang nahabiling kabanay nila ni Avenido ug Pugoy kon kaya ba nila nga buhion ang nailong mga bata aron adto posibleng itugyan kanila.
Kinahanglan pang makapasar sa capability assessment sa CSWS ang mga kabanay.
Apan kon di makaya sa mga kabanay nga buhion ang mga bata, hayan adto na lang kini sa kustodiya sa CSWS.
Kon kini mahitabo, buhatan kini og child study report nga iduso sa Department of Social Welfare and Development (DSWD) alang sa posibleng pagpa-adopt na lang niini.
“Normally sa mga center, ang ilaha pud kay dapat sibling gani, kuyogon gyud na sila. Di man sila buwagon. So, kon makaya sa mga relatives nila nga like ang tulo nga kuan managsuon gyud og amahan, pwede to sila usa and then another group, ” matod ni Perez.
TABANG
Giawhag ni Perez ang gusto motabang sa mga bata sa bisag unsa nga paagi sa pakig-alayon sa ilang buhatan.
Giklaro usab ni Perez nga mahimo gihapon nilang pabisitahon pagbalik sa haya sa ilang mga ginikanan ang mga bata kon ugaling ihangyo sa mga kabanay.
Tugotan usab kini nila sa pagtambong sa lubong unya sa ilang mga ginikanan.
Ubos sa proseso sa CSWS, magpabilin ang mga bata sa ilang pasilidad sulod sa tulo ka buwan samtang ila pang sutaon kon ipakustodiya ba sila sa mga kabanay.
“As of now among tan-awon pa pud amoang assessment sa ilang unsay level of trauma na nila kay tingale kung makakita sila sa area (sa ilang balay) ba mosamot ilahang trauma experience,” matod ni Perez.