UNOM sa 119 ka mga drivers sa mga pang publikong sakyanan sa Kamagayan terminal sa syudad sa Sugbo ug North Bus Terminal sa Mandaue nga gipaubos sa kinalit nga drug test nagpositibo sa paggamit og illegal drugs.
Kini kabahin sa kampanyang Oplan Harabas nga gihimo sa tibuok nasod.
Ang Philippine Drug Enforcement Agency (PDEA) 7 uban ang Land Transportation (LTO) 7, Land Transportation Franchising and Regulatory Board (LTFR) 7 ug Police Regional Office (PRO) 7 nagtambayayong paghimo sa Oplan Harabas.
Unang girumbo sa PDEA-7 ang mga V-hire sa Barangay Kamagayan.
Moabot og 50 ka drivers ang gipaubos dayon sa surprise drug test.
Laing 69 ang gi drug test usab sa North Bus Terminal.
Matod ni PDEA 7 Director Wardley Getalla nga ang tumong ug tuyo sa ilang kinalit nga drug test aron kalikayan nga adunay driver nga tiggamitan sa ilegal nga drugas nga maoy kasagarang hinungdan sa disgrasya sa kadalanan.
Sa datus sa PDEA national office, moabot na sa 3,600 ka mga drivers sa mga pampublikong sakyanan ang nangadakpan tungod sa paggamit sa ilegal nga drugas.
Kini ang hinungdan nga ang PDEA na alarma na niining maong gidaghanon sa mga driver nga mogamit sa ilegal nga drugas nga nakahatag nag peligro sa katawhan diha sa karsada.
“Purposely to ensure the riding public that the drivers are drug free. That’s why we are conducting surprise drug testing to all drivers,” matod ni Getalla.
Ang nagpositibo sa paggamit sa ilegal nga drugas bawian sa PDEA 7 sa ilang mga lisensya ug adunay kaso nga ipasaka batok kanila kon magpositibo sa confirmatory test.
Sigun ni Macario Getaruelas sa LTO-7 Mandaue nga mahimong suspensohon o ba kaha ma-revoke ang lisensya sa driver nga masuta nga positibo siya sa paggamit sa illegal nga drugas base sa Republic Act (RA) 9165 kun Comprehensive Dangerous Drugs Act of 2002.
Estrikto ang balaod may labot sa mga driver nga mahibaw-an nga tiggamitan sa illegal nga drugas hinungdan nga miawhag ang LTO ngadto sa mga driver sa publikong sakyanan nga di mag drugas.
“Kon mo drive gani ka, ayaw gyud pag drugs kay taas kaayo ang penalty ana. Nya kon mag drugs, ayaw pag drive,” matod ni Getaruelas. / AYB