USA ka dalaga ang gituohang nagpakamatay pinaagi sa pagpusil sa iyang kaugalingon gamit ang kalibre .45 nga pistola sulod sa lawak sa ilang panimalay didto sa Purok 1, Barangay Omena, lungsod sa Compostela, Comval Province, Biyernes sa hapon.

Nailhan ang biktima nga mao si Diane Ronde, 22, ug molupyo sa maong dapit.

Sa report nga nahagpat gikan sa Comval Province Police Provincial Office nasayran nga pasado alas 3:00 sa hapon.

Napalgan sa iyang mga kabanay nga wa nay kinabuhi nga nagbuy-od sa iyang katre ang biktima sulod sa iyang kwarto ug dunay samad pinusilan sa iyang ulo.

Una pa nahitabo ang pagpusil sa biktima sa iyang kaugalingon, nanirado kini sa iyang lawak, ug taud-taod ang milabay usa ka masipa nga buto sa pusil ang nabati.

Sa dihang giabri ang pultahan sa kwarto diha na lamang nakit-an ang biktima nga wa nay kinabuhi.

Mga miresponding kapulisan nakahipos og usa ka kalibre .45 nga pistola nga dunay serial number 154650, usa ka baseyo niini nga maoy gituohang gigamit sa biktima ug usa ka suicide note.

Ang kapulisan sa Compostela mihimo dayon og imbistigasyon sa hitabo.

Gisusi sab sa kapulisan kung dunay foul play sa kamatayon sa bikima. (Marvin Pineda)