PATAY ang usa ka 21-anyos nga tinun-an human gipusil sa armadong tulisan nga sakay ug motorsiklo sa dalan Tres de Abril, Barangay Labangon, syudad sa Sugbo niadtong Biyernes, alas 10:25 sa gabii, Marso 29.
Ang biktima mao si Jovanie Pat, nga taga Sitio Ibabao, Barangay Mambaling nga naigo sa iyang paa gamit ang wala pa matino nga calibre sa armas.
Matod ni Police Major Keith Allen Andaya, ang hepe sa Labangon Police Station, nga gikan sa Bible Baptist Church sa dalan Katipunan ang biktima kauban niya si Qunie Ruth Antivo apan pag-abot sa Tres de Abril kalit lang nangabot ang mga suspek.
Ang back rider sa motor maoy mition og armas sa mga biktima ug mimando nga ihatag ang bag ni Antivo.
Nagdumili sa paghatag ang biktima gani gibira pa ni Pat ang bag sa iyang kauban aron dili kini makuha apan gipusil hinuon siya tumong sa paa.
Dali nga misibat ang mga sakay sa motor nga mga tulisan sa wala matino nga direksyon.
Naabot usab dayon ang Mobile Patrol Group nga mao ra usab ang nagdala sa samaran sa Miller Adventist Hospital apan pipila ka gutlo ang milabay nakabsan gyud kini sa iyang kinabuhi.
Giingong naigo ang dakong ugat ni Pat nga mi resulta sa pag-agas sa daghang dugo nga maoy nakaingun sa iyang kamatayon.
“Pag-abot sa motor mition dayon ning suspek nila, giaksyon man to pag ilog ang bag karon mi resist man mao tong gipusil, gi-paa ra man unta to pero mao lagi naigo daw ang dako nga ugat ba mao toy namatyan ba murag loss of blood,” matod ni Andaya.
Duna nay gisubay nga posibling suspek ang Labangon Police Station nga maoy ilang itande sa panagway niini sa mga notadong tulisan sa dakbayan sa Sugbo.
Nakig-alayon na sila sa intelligence community nga maoy dali nga maka subay kinsa ang maong mga tulisan.
Subayon usab nila ang mga kuha sa CCTV camera sa dapit kung asa kini mipaingon sa pag sibat.