MAGKOMBATI karong gabii ang labing maayong mga basketbolista sa Pilipinas alang sa rehiyunal nga garbo sa 2019 Philippine Basketball Association (PBA) North-versus-South All-Star Game sa Calasiao Sports Center sa Pangasinan.
Ang starters sa North mao sila si Calvin Abueva, Japeth Aguilar, Paul Lee, LA Tenorio, ug Marcio Lassiter.
Ang ubang mga sakop sa North mao sila si Arwind Santos, Alex Cabagnot, Gabe Norwood, Troy Rosario, Jayson Castro, Stanley Pringle, ug Chris Banchero.
Ang starters sa South mao sila si June Mar Fajardo, Greg Slaughter, James Yap, Mark Barroca, ug Scottie Thompson.
Samtang ang mokompleto sa South mao sila si Terrence Romeo, Roger Pogoy, Chris Ross, Baser Amer, PJ Simon, Jio Jalalon, John Paul Erram, ug Joe Devance.
Modala sa North mao si Phoenix Fuel Masters coach Louie Alas samtang ang mogiya sa South mao si Rain or Shine Elasto Painters coach Caloy Garcia.
Gipasabot nila ni Alas ug Garcia nga ilaha ra’ng pasagdan ang mga magduduwa nga modiskarte ning kombatiha ug igo na lang silang mogiya kon kinahanglanon.
“We just have to see how the game progresses,” matod ni Alas sa PBA.PH. “Kasi, wala ka namang magagawa kundi iyon dahil kulang sa practice.”
Sa laing bahin, ang Rookies/Sophomores misandig sa katakos ni CJ Perez ug sa bayanihong nabuhat ni Javee Mocon sa hinapos nga bahin aron lupigon ang Juniors team, 141-140, sa NxtGen Challenge niadtong Biyernes sa gabii.
Gipangulohan ni Perez ang kadaugan pinaagi sa iyang 32 puntos apan ang labing krusyal nga puntos nahimo ni Mocon pinaagi sa iyang tip-in buzzer-beater shot nga maoy nagpadaog kanila.
“Siyempre nakaka-proud. Sa mga teammates ko, hindi sila tumigil sa paglalaro. Kahit All-Star nag-seryoso pa rin sila,” asoy ni Perez, kinsa lumad nga taga Sta. Barbara, Pangasinan.
Napiling MVP si Perez ning maong kombati.
Sa Slamdunk Contest, mikulit og kasaysayan si Rey Guevarra dihang naangkon niya pagbalik ang titulo.
Mao kini ang ikalimang Slamdunk title nga nalangkat ni Guevarra nga nakatabla sa rekord ni KG Canaleta.
Sa Three-Point Shootout, midaog ang beteranong si Peter June Simon sa labing una pa lang niyang pagsalmot ning maong panagtigi.
Nagkanayon ang 38 anyos nga si Simon nga bisan sa taas niyang kasinatian, giangkon niya nga gibati gihapon siya og kulba.
Samtang sa Obstacle Race, si Beau Belga maoy midaog.
Nasugakod ni Belga ang pagpanghudlat nila ni Russel Escoto ug Yousef Taha. / ESL