Mosley nagtuong dili pa angayang moretiro si Manny

HUGOT ang pagtuo sa kanhi three-division world champion Sugar Shane Mosley nga bisan sa edad nga 40, aduna gihapo’y saktong ikabuga si Filipino legend Manny Pacquiao batok sa mas batan-ong mga boksidor.

Si Mosley, 47, kinsa nalupig ni Pacquiao pinaagi sa unanimous decision niadtong 2011, nga basi sa iyang nakita kon giunsa pagdominar sa Pambansang Kamao sa Pilipinas si Adrien Broner niadtong Enero, dili pa angayang moretiro ang 8-division world champion.

Hinuon gipasabot ni Mosley nga aduna siya’y nabantayan nga haw-ang sa abilidad ni Pacquiao nga tatawng resulta sa pangidaron apan ang nahabilin niining katakos dili gihapon mabangbang.

“Manny had good speed, pretty good power, but his movement wasn’t the same as far as the way he moves and ducks and comes in,” pasabot ni Mosley sa interbyu sa www.noxboxing.com.

“It seemed like he was a little unsure sometimes when he would delve in. I think (he was hesitant) from the Marquez KO and Adrien Broner was really fast with the right hand, so Pacquiao was being careful. He was a little nervous to go all the way in because he knew Broner had a good right hand.”

Sa tan-aw ni Mosley, makahunahuna lang si Pacquiao nga moretiro kon adunay boksidor nga makakulata niini og insakto.

Kon pabiling dominahon ni Pacquiao ang iyang mga kontra sa umaabot, matod ni Mosley nga padayon kining moaway.

Matod ni Mosley nga dihang nag-edad siya og 40, nagtuo siyang kaya pa niyang lupigon ang batan-ong mga boksidor sa welterweight division hinungdan nga wala pa sab siya miretiro niadtong higayuna. / ESL