BUOT ipatawag sa komitiba sa social services ang nagkadaiyang sektor aron nga ipasilsil sa alimpatakan sa mga kabataan ang pagbaton og kahadlok sa Ginoo aron nga mamenusan ang mga nahitabong mga paghikog, pagkamabdos sa batang edad ug uban pa.
Atol sa sesiyon sa konseho naghatag og special report si Kagawad Reuben Daba, tsirman sa maong komitiba aron nga ipadayag ang tumong nga buot niining ipatawag ang mga inter sector aron nga mogahin og panahon sa pagtudlo sa mga kabataan.
“Ato kanang hangyuon ang atong interfaith nga mag-anha sila, makita nako medyo kulang gyud ang kahadlok sa Ginoo ug pag train sa mga bata mao kana ang kulang ug ugma damlag, 10 years from now together we can tap our shoulders back that we did the right thing,” matud ni Daba.
Sa pakighinabi ngadto na kay Daba gibutyag niini nga dako na kaayo ang kalainan karon sa mga kabataan diin halos wala na kini mga respeto ug kahadlok sa Ginoo hinungdan na usab nga daghan nga mga insidente ang gikalambigit sa mga kabataan sama sa mga krimen, teenage pregnancy ug depresiyon nga mosangpot sa pagpakamatay.
“Kung naay kahadlok ang bata sa Ginoo kanang teenage pregnancy, magamay-gamay ang kanang paghikog mogamay kuyng naa kay kahaldok sa Ginoo bisan unsa pa imong religious affiliation, ang importante naa kay ma estoryahan,” dugang niini.
Buot niini nga sa pagbukas sa bulan sa Hunyo masugdan na ang pagtudlo sa nagkadaiyang relihiyosong grupo diha sa mga kabataan ilabi na sa programa sa Child Development Center sa mga kabataan nga nag-edad og 3 ka tuig hangtod sa 7.
Suportado usab kini ni Kagawad Edna Dahino kinsa tsirman sa Women and family relation kinsa lakip sa buot ni Daba nga makigtagbo aron nga magmalampuson kini nga tumong kauban usab ang tsirman sa edukasiyon nga si Kagawad Suzette Daba.
“I strongly support with this development that this is really what we need sa atong mga bata, so dili lang kutob lang ta pagpa eskwela and pagpakaon we need to teach our children to be a good citizen and to be a good or responsible adult pag abot sa panahon,” matud ni Dahino.
Buot ni Daba nga matudloan og pagrespeto ug kahadlok sa Ginoo ang mga kabataan gumikan kay dako matud kini kaayo nga tabang aron nga malikay ang mga kabataan sa mga tentasiyon sa palibot sama na lamang sa paghimo og mga dautang binuhatan, depresiyon ug uban pa.