USA sa atubangon sa bag-o pang mabuang sa biseklita mao ang pagpili og frame nga haum sa body geometry. Di pa kaayo nimo ma-feel ang iyang ka importante kon dug-ol pa ang imong biyahe. Apan kon magkalayo ka, anha na nimo masinati ang pagpanakit sa ubang parte sa imong kalawasan tungod kay ang geometry sa lawas ug biseklita, di haum.
Sa una, nag-ilis-ilis ko og frame sizes. Gikan sa 14 ngadto sa 16.5. Mas haum ko sa 14 nga maoy akong gipili dihang nipalit ko og laing frame ug nagpabarog og laing mountain bike. Bisan ang pagkabutang sa imong saddle ug gintang niini sa imong bottom bracket mo-matter. Bisan gani ang pagbutang sa saddle, mo-matter gihapon.
Mao bitaw nga sa mga professional road cyclist, tailored sa ilaha ang ilang biseklita. Tanang geometry sa biseklita gipahaum sa ilang sukod sa lawas. Ingon niana ka importante ang geometry sa biseklita.
Mga kapin sa usa ka tuig nagsige na kog ilis-ilis og parts hangtod ko na-comfortable sa akong ride.
Busa, mas maayong mag-research ka una kon unsa ang fit nimo nga sukod sa biseklita, gikan sa frame size, sukod gikan sa top tube ngadto sa head tube.
Sa akoa, mas ganahan ko sa gamay nga frame size kay sa ako nang giingon, mapadak-an.
ILISI NA
Sa late 80s ug early 90s, proud kaayo ko sa atoang traffic system kay maoy labing moderno sa tibuok nasod. Bisan akong higala nga taga Metro Manila, pwerteng dayeg sa atoang traffic system.
Apan karon, sa sigeng away sa pulitika, ang atoang traffic system naniguwang na. Ang traffic lights nato maora pag panahon ni Mampor. Nabiyaan na kita bisan sa mga Dakbayan sa Mandaue ug Lapu-Lapu.
Bisan kon grabe kahuot ang kahimtang sa trapiko, mas maayo nga ang atoang traffic lights bag-uhon pud. Kana ganing dunay timer? Kini man gud importante kaayo tungod kay makatampo ni sa road safety.
Kon makakita ka sa numero kon pila na lang ka seconds, sagad mohunong o momenor ka na lang. Di pareho anang wa kay makita, magtagna tagna ka na lang.
LAHI RA
Kon mosuroy o mobiyahe ka, lahi ra kon two-wheeled nga sakyanan ang imong gamiton. Ang imong panan-aw di masampungan, 360 degrees. Mas maka-appreciate ka sa mga talan-awon kay way makasampong sa imong panan-aw. Pangutan-a ang mountain bikers ug motorcyclists, di ba mo-confirm sila.
Mao na sukad nag-scooter ko, mas ganahan kon mosuroy kay mas makakita ko sa kaanindot sa lugar. Nganong ganahan sab ko sa biseklita? Kay gawas nga makalantaw ko sa mga talan-awon, nakapasingot ko.
Kon ikaw way hilig ini, suwayi lang. Mas maka-appreciate ka sa maanindot nga mga talan-awon. Ma enjoy ka sa sigeg laag.