KINING tawo nga nagdagan usa sa mga kinaham nga yugto sa pelikula o telebisyon. Pananglit duha ka tawo nga nagpaugnat sa kusog sa dagan. Gamay ra kaayo ang gilay-on sa una ug ikaduha. Mahimo sad nga usa ka pamilya nga nahabulag sa usag-usa nga nagkatipon og usab. Nagdagan ang mga sakop sa banay padulong sa usag-usa. Mahimo sad nga duha ka managtrato nga nagkaabot. Usahay i-“slow motion” pa kini nila. Drama. Makadani sa pagbati.
May laing drama diha sa ebanghelyo. May anak nga gihimaraot ang iyang relasyon sa iyang amahan pinaagi sa pagpangayo sa iyang kabilin bisag buhi pa iyang amahan. Giusik-usikan niya kini ug nasadsad siya sa pagkaalaot. Mibalik siya sa iyang amahan sa dihang dili na niya maagwanta ang iyang kahimtang. Layo pa gani siya, nagdagan na ang iyang amahan padulong kaniya. Naghulat diay kini sa iyang way-uwaw nga anak.
Drama kini sa naghingaping kaluoy sa Dios. Mora Siyag ang amahan sa maong sambingay. Kanunayng Siyag gahulat sa pagbalik sa mga nahisalaag. Dili Siya andam mohukom. Gani “mas daling pugngan sa Ginoo ang Iyang kasuko kaysa Iyang kaluoy”.
Ang Pangilin sa Pagsaylo sa mga Israelita mogamit og pan nga walay patubo. Pahinumdom kini sa panahon nga daw nagdagan sila gawas sa Ehipto. Sa dihang miabot sila sa Gisaad nga Yuta, miingon ang Ginoo: “Karong adlawa giwagtang ko ang inyong pagkatinamay ingon nga ulipon”. Sumala pa sa libro ni Josue, “Unya mihunong pag-ulan ang mana ug wala na makabaton niini ang mga Israelita. Sugod niadtong tuiga nagkaon na silag kalan-on nga abot sa Canaan”. Wala na sila magdagan.
Ang pagpasig-uli sa anak ngadto sa iyang amahan naglarawan sa gihimo sa Dios kanato pinaagi ni Cristo, Iyang bugtong Anak. “Walay sala si Cristo, apan gipaambit siya sa Dios sa atong sala aron kita, sa atong pagkahiusa kaniya, makaambit sa pagkamatarong sa Dios”, matud pa ni San Pablo ngadto sa mga taga-Corinto. Ang pagdagan sa amahan sa sambingay mahimong itandi sa pag-ambit ni Jesus sa atong pagkamakasasala bisan siya hawa sa sala. Nindot ang bunga: “Kay bisan kinsa nga nahiusa kang Cristo, bag-o na siyang binuhat; ang daan miagi na, ug miabot na ang bag-o”.
Nagdagan ang mga adlaw sa Kuwaresma. Dili kini nato usikan. Mobalik kita sa Dios pinaagi sa mga sakramento sa Simbahan. Diha, pananglit, sa sakramento sa kompisal gigakos kita sa Langitnong Amahan nga nagdagan nga buot mopasaylo kanato. Dawaton ug hinulsolan lamang nato ang atong mga sala.
Nagdagan ba sad kita padulong sa Ginoo?