ANG dakbayan sa Davao maoy dunay pinakadaghan nga ihap sa kasong dengue sa Region 11, kon diin niabot na kini og 644 sulod lang sa tulo ka bulan, itandi ngadto sa 274 sa samang gidugayon sa 2018.
Sumala ni Julinda Acosta, City Health Office (CHO) technical division chief, 557 niini gikompirma nga kasong dengue.
Gitaho ni Acosta nga ang dakbayan nakatala og usa ang namatay karong tuiga, 84 anyos nga lalaki gikan sa Times Beach sa Matina.
Ang dakbayan maoy usa sa dengue “hotspots”, sumala sa bag-ong taho gikan sa Department of Health (DOH). Laing mga lugar naglakip sa Apayao, Compostela Valley, Davao del Norte, Davao del Sur, Davao Oriental, North Cotabato, South Cotabato, Sultan Kudarat, Maguindanao, Agusan del Norte, Agusan del Sur, Surigao del Norte, ug Surigao del Sur.
Ang DOH nitala na og 49,000 kaso sa dengue sa tibuok nasud.
Ang kasong dengue nitaas sab sa kasikbit nga mga munisipalidad ug probinsiya, uban sa kinatibuk-ang ihap nga 1,551 kaso (2 patay) sa Davao Region. Ang ihap nitaas gikan 566 (1 patay) sa 2018.
Nisunod sa dakbayan sa Davao nga dunay pinakadaghan nga kaso sa dengue mao ang Compostela Valley nga 359 (walay patay), unya ang Davao Oriental nga 318 (usa patay), Davao del Norte nga 191 (way patay), Davao del Sur nga 32 (way patay) ug Davao Occidental nga 7 (way patay).
Ang Davao Occidental mao lay probinsiya nga niubos ang kaso, gikan sa 11 sa milabay nga tuig.
Matud ni Acosta nga ang gisawod nga tubig sa bag-ohay lang nga ulan, naglakip sa Bagyong Chedeng, nakatampo sa pagtaas sa ihap sa kaso.
Gibutyag sab niya nga ang summer season maoy pinaka-peak sa panahon sa dengue tungod sa mga natanggong nga mga tubig.
Gikanayon ni Acosta nga ang CHO nagplano nga molusad og Citywide Clean Up sa dakbayan, kon diin laing mga ahensiya ang kuhaon aron nga motabang sa buhatan sa ilang paningkamot sa pagpakubos sa ihap sa kaso sa dengue.
Apan iyang gitin-aw nga ang komunidad kinahanglan nga mohimo sab sa ilang bahin.
“Gina-awhag namo ang mga tawo na motabang sa amo kay in the first place, dili lang man namo ni trabaho ang manlimpyo sa ilang tugkaran,” awhag ni Acosta.