Namatay ang 21 anyos nga lalakeng tinun-an sa college human pusila sa armadong tulisan nga sakay og motorsiklo sa alas 10:25 Biyernes sa gabii, Marso 29, sa dalan Tres de Abril, Barangay Labangon, Siyudad sa Sugbo.
Ang biktima giilang mao si Jovanie Pat, taga Sitio Ibabao, Barangay Mambaling nga naigo sa iyang paa gamit ang wa pa matino nga kalibre sa armas.
Matod ni Police Major Keith Allen Andaya, hepe sa Labangon Police Station 10, nga gikan sa Bible Baptist Church sa dalan Katipunan sila si Pat kauban si Qunie Ruth Antivo nga naglakaw lang.
Apan pag-abot sa Tres de Abril, kalit lang nangabot ang mga suspek.
Ang backrider sa motorsiklo maoy nition og armas nila ni Pat ug Antivo ug nimando nga ihatag ang bag sa babaye.
Giingong nagdumili sa paghatag si Antivo sa bag, matod ni Andaya.
Gani gibira pa ni Pat ang bag ni Antivo aron di makuha hinungdan nga gipusil siya tumong sa paa.
Dali nga nisibat ang mga tulisan sa wa matino nga direksyon.
Naabot usab dayon ang Mobile Patrol Group (MPG) nga nitubag sa alarma.
Mao ra usab kini ang nidala kang Pat sa Miller Hospital, apan pipila ka gutlo ang milabay, nakabsan kini sa kinabuhi.
Giingong naigo ang dakong ugat ni Pat nga niresulta sa pag-agas sa daghang dugo nga maoy nakaingon sa iyang kamatayon.
“Pag abot sa motor, mition dayon ning suspek nila. Giaksyon man to pag-ilog ang bag, karon mi resist man (Pat) mao tong gipusil. Gipaa ra man unta to, pero mao lagi, naigo daw ang dako nga ugat ba mao toy namatyan ba. Maorag loose of blood,” matod ni Andaya sa Superbalita Cebu.
Duna nay gisubay nga suspek ang Labangon police station nga maoy ilang itandi sa panagway niini sa mga notadong tulisan sa dakbayan sa Sugbo.
Nakig-alayon na sila sa intelligence community nga maoy dali nga makasubay kinsa ang maong mga tulisan.
Subayon usab nila ang mga kuha sa CCTV camera sa dapit kon asa kini nipaingon sa pagsibat.
Si Pat gihulagway sa pipila ka mga netizen nga nakaila kaniya nga buotan ug matinahuron.
Niadtong miaging Dominggo, usa ka gikatahapang tulisan ang napatay sa off-duty nga pulis nga luwan sa PUJ.
Sa pagsusi sa Cebu City Police Office (CCPO), si Hygie Mendez Mambiar, taga sitio Tabay Lawom, Barangay Tisa, siyudad sa Sugbo, maoy suspek sa pipila ka mga tulis sa Pardo.
Nakuhaan siya og CCTV footage.