Unsay ilang mga saad kon sila ang mapili?

KAMPANYA: Miarangkada dayon ang mga managkaatbang nga kandidato sa lalawigan sa Sugbo sa pagsugod sa kampanya. Sila si Bise Gobernador Agnes Magpale ug Gobernador Hilario Davide III  mingbisita sa mga lungsod. Mao usab sila si Kong. Gwen Garcia ug Daphne Salimbangon, nanglibot sa mga lungsod ug siyudad.  Init nga topic: drugs, traffic ug mga imprastraktura. (Allan Cuizon  & Alex Badayos)
KAMPANYA: Miarangkada dayon ang mga managkaatbang nga kandidato sa lalawigan sa Sugbo sa pagsugod sa kampanya. Sila si Bise Gobernador Agnes Magpale ug Gobernador Hilario Davide III mingbisita sa mga lungsod. Mao usab sila si Kong. Gwen Garcia ug Daphne Salimbangon, nanglibot sa mga lungsod ug siyudad. Init nga topic: drugs, traffic ug mga imprastraktura. (Allan Cuizon & Alex Badayos)

Paghiusa sa mga mayor sa mga siyudad ug kalungsuran sa lalawigan sa Sugbo ug pagsulbad sa mga suliran sa trapiko ug gidili nga drugas, ang buhaton ni Kongresista Gwendolyn Garcia kon siya ang modaog sa piniliay sa Mayo 13.

Samtang, pagpaayo sa provincial roads ang prayoridad ni Bise Gobernador Agnes Magpale kon siya ang modaog pagka gobernador sa lalawigan sa Sugbo.

Sa pagsugod sa unang adlaw sa kampanya niadtong Biyernes, Marso 29, ang magkaatbang nga mga kandidato sa pagka gobernador sa Sugbo nangampanya kuyog sa ilang running mates - si Garcia uban ni Daphne Salimbangon sa habagatang lalawigan unang nirumbo samtang sa amihanan si Magpale kuyog ni Gobernador Hilario Davide III.

“We need to get all the mayors together and understand our common problems. There needs to be a leader who will be able to get everybody on board because our borders are artificial. Borderless ang problema nato sa traffic, drainage, waste water, even drugs and terrorism,” matod ni Garcia.

Sa iyang habig, sigon ni Magpale iyang nakita nga gubaon na ang mga provincial road, apil ang mga karsada nga ilang gisubay atol sa campaign caravan sa mga lungsod sa amihanang Sugbo niadtong Biyernes.

Sumala sa bise gobernador tinuod nga napaayo ni Garcia ang gatosan ka kilometros nga provincial road, apan aspalto lang kini.

“Unya di man maayo ang base preparation, guba gyud kaayo karon,” pamulong ni Magpale.

Tinguha usab niya nga mahimoan og alternate route ang mga sakyanan nga mopaingon ug mogikan sa amihanang Sugbo.

Sigon ni Garcia sa dihang siya ang gobernador sa Sugbo, siya nilingkod sa mga tigom Metro Cebu Development and Coordinating Board uban sa local chief executives ug ilang gituki ang nag-unang mga suliran sa Sugbo.

Iyang gipahimug-atan ang panginahanglan sa mass transport system labi na sa mga nagtrabaho sa siyudad sa Sugbo nga naa nanimuyo sa silingang mga lungsod ug dakbayan, ug ang higpit nga pagpuhag sa illegal drugs.

Si Garcia nipadayag nga kaniadto ang Cebu Provincial Detention and Rehabilitation Center nabantog nga tourist destination ug naila sa ubang kanasuran ang mga dancing inmate, karon nahimo kini nga “a hotbed, a haven for shabu.”

Ang One Cebu nagsugod sa ilang campaign caravan sa lungsod sa Argao, ang hometown ni Davide diin nihalad sila og misa sa Archdiocesan Shrine of St. Michael the Archangel ug dayon ang pag-isa sa mga kamot sa lokal nga mga kandidato sa Argao.

Sila nilibot ug nihimamat sa ilang lokal nga mga kandidato sa una, ikaduha, ikaunom ug ikapito nga mga distrito kuyog si senatorial candidate Ramon “Bong” Revilla Jr.

Samtang sila si Magpale ug Davide nisuroy sa 11 ka mga siyudad ug lungsod sa amihanang Sugbo uban ni Senador Paolo Benigno “Bam” Aquino IV.

Nagsugod sila pinaagi sa pagsimba sa Sto. Tomas de Villanueva Parish sa siyudad sa Danao ug dayon nag-caravan padung sa Compostela, Carmen, Catmon, Sogod, Borbon, Tabogon, Medellin, Bogo City ug Daanbantayan.

Tungod sa solido nga suporta sa mga kaalyado sa pulitika, si Magpale nikonsiderar nga upat sa pito ka mga distrito sa lalawigan sa Sugbo ang ilang balwarte.

Ang mga distrito nga iyang gipasabot mao ang ikalima, ikaupat, ikaduha ug ikapitong mga distrito.

Si Magpale, gubernatorial candidate sa Barug Alang sa Kauswagan ug Demokrasya (Bakud) party, niingon ang ikalimang distrito mao ang naila nga balwarte sa mga Durano ug Bakud party sud sa daghang katuigan.

Niadtong Oktubre sa miaging tuig, nakig-alyansa ang Bakud party sa National People’s Coalition (NPC).

Matod ni Magpale, uban sa presensiya ni kanhi Bogo City Mayor Celestino Martinez Jr. lig-on sila sa ikaupat nga distrito.

Ang presensiya sa mga Calderon sa ikapito samtang unom sa pito ka incumbent nga mga mayor sa ikaduha nga distrito, gituohan nga nagpaluyo sa mga kandidatura ni Magpale ug Davide, makaingon ang bise gobernador nga lig-on usab sila.

Ang unom ka mga mayor mao sila si Alcoy Mayor Michael Angelo Sestoso, Argao Mayor Stanley Caminero, Boljoon Mayor Merlou Derama, Oslob Mayor Jose Tumulak Jr., Samboan Mayor Emerito Calderon ug Santander Mayor Marilyn Wenceslao.

Si Dalaguete Mayor Ronald Allan Cesante, second congressional district candidate ug sakop sa One Cebu party nga gipangulohan ni Cong. Gwen Garcia. Sigon ni Magpale bisan og anaa ang mga Gullas sa unang distrito, apan siya masaligon nga literate ang mga botante sa maong distrito labi na sa mga isyu sa Balili property ug Cebu International Convention Center (CICC). SCG, RTF

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph