GIBANA-BANANG di mominos 20,000 ka mga tawo ang mitambong sa opening salvo rally sa Team Mandaue ni mayoralty candidate ug Kongresista Jonas Cortes niadtong Biyernes sa gabii, Marso 29, sa usa ka luna sa North Reclamation Area.
Apan ang nakakuha og atensyon atol sa kalihukan mao ang pagtambong ni Pinky Quisumbing-Alvarez ug anak niining si Neil, kinsa kabanay ra usab sa kaatbang ni Cortes pagka mayor sa dakbayan nga si Mandaue City Mayor Luigi Quisumbing.
Si Alvarez iyaan sa mayor.
Gikalipay ni Cortes ang pagpakita sa suporta sa pipila sa banayng Quisumbing kaniya ug sa iyang mga kauban gumikan kay maisip kini nga dakong bintaha ngadto kanila.
Giangkon hinuon ni Cortes nga nagpabiling higpit gihapon ang ilang kompetisyon alang sa lingkuranan sa dakbayan hinungdan nga maninguha sila og maayo sa ilang pangampanya.
Iyang gipasalig ngadto sa ilang dumadapig nga wagtangon ang ordinansa sa dakbayan nga nagdili sa pagsuot og bonnet ug face mask sa mga mag motor sa higayon nga makalingkod og balik sa dakbayan.
Iyang gisaway ang naasoyng ordinansa sanglit wa gihapon kini makasulbad sa mga insidente sa pagpamusil sa dakbayan nga gipaluyohan sa mga riding in tandem nga mga mamumuno.
Si Qusiumbing sa iyang bahin wa una mokomentaryo kalabot sa presensya sa iyang iyaan ug ig-agaw sa rally ni Cortes.
Wa pa usab silay plano nga mopahigayon og dakong rally inay mas gipili nila nga magpahigayon na lang una og pulong-pulong sa kabarangayan sama sa ilang gibuhat sa nangaging mga buwan. GCM