PATAY ang usa ka high value target (HVT) human giingon nga nisukol sa kapulisan atol sa pag-serve sa search warrant kabahin sa ilegal nga drugas sa Sitio Sta. Cruz, Barangay Lower Mohon, Dakbayan sa Talisay, Sabado sa kaadlawon, Marso 30.
Ang patay giila nga si Eric Salonoy Ruiz, 28, kinsa residente ra usab sa dapit.
Ang search warrant giisyu ni Judge Jacinto Fajardo Jr., presiding judge sa Regional Trial Court Branch 66 sa Talisay City.
Inubanan sa Drug Enforcement Unit sa Talisay City Police Office ug sa intelligence operatives nga gipangulohan ni Police Major Ardioleto Cabagnot, moimplementar unta kini sa search warrant ni Ruiz alas 3:20 sa kaadlawon sa naasoy nga adlaw.
Apan atol sa pag-abot nila sa dapit, nakamatikod ang suspek sa presensya sa kapulisan.
Giingon nga unang nipabuto si Ruiz sa kapulisan sulod sa iyang panimalay apan gibaslan kini.
Gisuwayan pa kini pagtabang sa Talisay City Rescue and Emergency Assistance Team (TREAT) apan namatay.
Nakuhaan kini og armas ug nagkadaiyang bala ug usa ka dako nga pakete sa shabu.